ކާބޯތަކެތީގެ ޚިދުމަތްދޭ ތަންތަނުން މެންދަމު އެކެއް ޖަހަންދެން ޚިދުމަތްދިނުމުގެ ހުއްދަ އިކޮނޮމިކް މިނިސްޓްރީން މިއަދު ދީފިއެވެ.

އިކޮނޮމިކް މިނިސްޓްރީން މިއަދު ކޮށްފައިވާ އިޢުލާނެއްގައި ބުނެފައިވަނީ، ކޯވިޑް-19 އިން ރައްކާތެރިވުމަށް އަޅާފައިވާ ޚާއްޞަ ފިޔަވަޅުތަކަށް ބަދަލު ގެނައުމާގުޅިގެން، ކާބޯތަކެތީގެ ޚިދުމަތްދޭ ތަންތަން ޢާންމުންނަށް ހުޅުވާލައިގެން ޚިދުމަތް ދެވޭ ވަގުތު ފަތިހު 4:00 އިން މެންދަމު 1:00 އަށް ބަދަލުކޮށްފައިވާ ކަމަށެވެ.

ކޮވިޑާ ގުޅިގެން އަޅާފައިވާ ފިޔަވަޅުތަކުގެ ސަބަބުން ގެއްލުން ވަމުންދާކަމަށް ބުނެ ރެސްޓޯރެންޓް އެސޯސިއޭޝަނުން މީގެ ކުރިން ވަނީ މުޒާހަރާވެސް ކޮށްފައެވެ. ނަމަވެސް ސަރުކާރުން ބުނެފައި ވަނީ 161 ކެފޭ ރެސްޓޯރެންޓަށް ސަރުކާރުން މާލީ އެހީތެރިކަން ފޯރުކޮށްދީފައިވާ ކަމަށެވެ.

ކޯވިޑާ ގުޅިގެން ހޮޓާ، ކެފޭ، އަދި ރެސްޓޯރެންޓްތަކަށް ލިބުނު ގެއްލުމާއި ގުޅިގެން ބަދަލެއް ދިނުމަށް ރައްޔިތުންގެ މަޖިލީހަށް ހުށަހެޅި ނަމަވެސް ބަދަލު ދިނުމަށް ތާއީދު ލިބިފައެއް ނުވެއެވެ. ނަމަވެސް ސަރުކާރުން ވަނީ މި ގެއްލުންތަކުން އަރައިގަތުމަށް ޚާއްޞަ ލުއި ލޯނު ސްކީމެއް ތަޢާރަފުކޮށްފައެވެ.

މާލޭގައި ހިންގާ ހޮޓާ، ކެފޭ، އަދި ރެސްޓޯރަންޓް ތަކުގައި މަސައްކަތްކުރާ މުވައްޒަފުންގެ ގާތްގަނޑަކަށް 99 އިންސައްތައަކީ ބިދޭސީން ކަމަށްވާތީ އެތަންތަނަށް ލިބޭ ގެއްލުމުގެ އަސަރު ވަކިވަކި ދިވެހީންނަށް ކުރާ މިންވަރު ކުޑަ ނަމަވެސް ގިނަ ބަޔަކު ޚިދުމަތް ހޯދާތީ އެތަންތަން ބަންދުކުރުމުން ޚިދުމަތް ހޯދާ ފަރާތްތަކަށް ވަރަށްބޮޑަށް ދަތިވާކަން ފާހަގަކުރެވެއެވެ.