ރައީސް ޔާމީނަކީ ޙުކުމެއް އިއްވާފައިވާ ގައިދީއެއް ކަމަށާއި، ވީއެންމެ އަވަހަކަށް އެމަނިކުފާނު ޖަލަށް ގެންދިއުމަށް ފޭދޫ ދާއިރާގެ ރައްޔިތުންގެ މަޖިލީހުގެ މެންބަރު މުޙައްމަދު ނިހާދު ގޮވާލައްވައިފިއެވެ.

މެންބަރު ނިހާދު މިމޭރުމުން ވިދާޅުވެފައިވަނީ، ރައީސް ޔާމީން މިނިވަން ކުރުމަށް ގޮވާލާ އިދިކޮޅު ކޯލިޝަނުން ޤަރާރެއް ފާސްކުރުމާ ގުޅިގެން އެކަމަށް ރައްދު ދެއްވުމުގެ ގޮތުންނެވެ. މެންބަރު ނިހާދު ވިދާޅުވީ، ޤައިދީން މިނިވަން ކުރުމުގެ މަސައްކަތަކީ ކްލެމެންސީ ބޯޑުން ކުރާ ކަމެއް ކަމަށެވެ.

ކޯވިޑް-19 އިން ދިފާއުވުމަށް ގިނަ ބަޔަކު މިހާރު ވެކްސިން ޖަހާފައިވާތީ، ރައީސް ޔާމީން އަނބުރާ ޖަލަށް ގެންދަންޖެހޭ ކަމަށް މެންބަރު ނިހާދު ވިދާޅުވިއެވެ. އަދި އެއީ މަސްލަޙަތު އެންމެ ރަނގަޅުގޮތްކަމަށް ވެސް މެންބަރު ނިހާދު ވިދާޅުވިއެވެ.

ފަނޑިޔާރުންކަމަށް ބެލެވޭ ބައެއްގެ އޯޑިއޯއެއް ލީކުވެފައިވާތީ އެކަމާ ގުޅޭގޮތުން ނިހާދު ވިދާޅުވީ، އެ އޯޑިއޯ އަކީ ފައިސާދީގެން ފަނޑިޔާރުންގެ އަގު ވައްޓާލަން ހިންގާފައިވާ ޢަމަލެއް ކަމަށެވެ. އަދި އެގޮތަށް އެކަން ނުކުރުމަށް އާދޭސް ދަންނަވާކަމަށް ނިހާދު ވިދާޅުވިއެވެ.

"ބޮޑު ވަގަކު ސަލާމަތްކުރަން ސުޕްރީމް ކޯޓަށް ނުފޫޒު ފޯރުވުމުގެ މަޤުސަދުގައި ހިންގަނީ ވަރަށް ދަށު ދަރަޖައިގެ ޢަމަލެއް." މެންބަރު ނިހާދު ވިދާޅުވެފައިވެއެވެ.

Faisaa dheegen audio eh hadhai fandiyaarun ge Agu vattaalan kuraa Masakkaih harukashi ibaaraathun kuhveri kuran! Bodu Vagaku salaamaih kuran Supreme Court ah Nufooz foaruvumuge Magusadh gai hinganee varah dhashu dharajaige amaleh! Court thakuge Agu vattaanulumah aadheys kuran!

— Feydhoo Meehaa (Mohamed Nihad) (@nihad_m) August 30, 2021

ނިހާދު އިތުރަށް ވިދާޅުވީ، ދިވެހި ފަނޑިޔާރުގެތަކާއި ފަނޑިޔާރުންގެ އަގު ވައްޓާލުމަށް އޯޑިއޯތައް ހަދައި ފިތުނަ ކުރުމަށް ނޫސް ކޮންފަރެންސްތައް ބާއްވައި ދޮގު ޚަބަރު ފަތުރާ މީހުން ހުއްޓުވުމަކީ ޤައުމީ ސަލާމަތަށްޓަކައި ކޮންމެހެން ކުރަންޖެހޭ ކަމެއް ކަމަށެވެ.

ލީކުވެފައިވާ އޯޑިއޯ ތަކުގައި ވާހަކަ ދައްކަވާ ކަމަށް ބުނާ ފަނޑިޔާރުން މިރޭ ވަނީ އެއީ އެބޭފުޅުންގެ އަޑު ނޫންކަމަށް ބުނެ އެ އޯޑިއޯތަކުގައި ދައްކާ ވާހަކަތައް ދޮގުކޮށްފައެވެ. އެކަމާ ގުޅިގެން ނިހާދު ވަނި އިދިކޮޅު ކޯލިޝަންގެ ޑްރާމާ އަތަށް ގޮވައިކަމަށާއި، ފޭކް ޑްރާމާ ކުޅެގެން ފަލީހަތްވުން ނޫން ކަމެއް ނުވާނެ ކަމަށް ވިދާޅުވެފައެވެ.