މޯލްޑިވިއަންގެ މައްސަލަ ގޯހުން ގޯހަށް ގޮސް ކުންފުނީގައި މަސައްކަތްކުރާ ޕައިލެޓުންގެ ޑިމާންތައް ޙައްލުކޮށްދިނުމަށް މެނޭޖްމަންޓަށް މުހުލަތެއް ދީފިއެވެ.

ކުންފުނީގެ މެނޭޖްމަންޓާއި ޕައިލެޓުންގެ މެދުގައި މިރޭ ބޭއްވި ބައްދަލުވުމުގައި ޕައިލެޓުން ވަނީ އަންނަ އާދީއްތަ ދުވަހުގެ ނިޔަލަށް ޕައިލެޓުންގެ ޑިމާންޑްތަކަށް ޙައްލެއް ހޯދައިދިނުމަށް މެނޭޖްމަންޓަށް ހުށައަޅާފައެވެ. އަދި އެ މުއްދަތުގައި އެކަންކަމަށް އިޖާބަނުދީފިނަމަ އިޙްތިޖާޖް ކުރުމުގެ ގޮތުން މަސައްކަތަށް ނުނިކުންނާނެ ކަމަށް އެތެރޭގެ އުދުހުންތަކުގައި ބޭނުންކުރާ ޑޭޝް-8 މަރުކާގެ ބޯޓު ދުއްވާ ޕައިލެޓުން ވަނީ ބުނެފައެވެ.

ޕައިލެޓުން ޑިމާންޑް ކުރަމުންދަނީ ކޯވިޑް-19ގެ ޙާލަތު ކުރިމަތިވީއިރު، ޕައިލެޓުންގެ މުސާރަ ހުރި މިންވަރަށް މުސާރަ އަލުން އިއާދަ ކޮށްދިނުމަށެވެ. ނަމަވެސް މިރޭގެ ބައްދަލުވުން ނިމުމުގެ ކުރިން ކުންފުނީގެ ވެރިން ބައްދަލުވުން ދޫކޮށް ގޮސްފައިވާކަމަށް މަޢުލޫމާތު ލިބިފައިވެއެވެ.

"ރަސް އޮންލައިން" އަށް މަޢުލޫމާތު ލިބިފައިވާ ގޮތުގައި މޯލްޑިވިއަންގައި މަސައްކަތް ކުރާ ގިނަ ޢަދަދެއްގެ ޕައިލެޓުން ދަނީ އެ ކުންފުނިން އިސްތިއުފާ ދެމުންނެވެ. އެގޮތުން މިހާތަނަށް ހަތް ޕައިލެޓުން ވަނީ އިސްތިޢުފާ ދީފައެވެ.

ރާއްޖޭގެ ބައެއް މީޑިއާތަކަށް މަޢުލޫމާތު ދެމުން "މޯލްޑިވިއަން" އިން ބުނެފައި ވަނީ، ޕައިލެޓުން އިސްތިޢުފާ ދީފައިވަނީ އެއްފަހަރާ ނޫންކަމަށާއި، ވަކިވަކިން ކަމަށެވެ. އަދި ޕައިލެޓުން އިސްތިއުފާދިން ނަމަވެސް ކުންފުނީގެ އޮޕަރޭޝަންސް އަށް ބުރޫ ނާރާނެ ކަމަށް އެ ކުންފުނިން ވަނީ ބުނެފައެވެ.

ރާއްޖޭގެ ގައުމީ އެއާލައިން މޯލްޑިވިއަންގެ މާލީހާލަތު ވަރަށް ބޮޑަށް ދަށްވެ ހިންގުން ވަރަށް ބޮޑަށް ބޮއްސުންލާފައިވާ ކަމަށްބުނެ އެތަނުގެ ބައެއް މުއައްޒަފުންނާއި އެތަނުން ވަކިވެފައިވާ މުވައްޒަފުން އަންނަނީ ކަންބޮޑުވުން ފާޅުކުރަމުންނެވެ.