އއ. ބޮޑުފުޅަދޫގައި އެއް މަހާ ފަސް ދުވަހުގެ ތުއްތު ކުއްޖަކު ނިޔާވެއްޖެއެވެ.

އިއްޔެ މެންދުރު މި ޙާދިސާ ހިނގުމަށް މެދުވެރިވީ ތުއްތު ކުއްޖަށް ގާތުން ދެމުން ދިޔަ ވަގުތު މަންމައަށް ނިދި ޖެހިފައި އޮއްވައެވެ. މަންމައަށް ހޭލެވުނުއިރު ކުއްޖާގެ އަނގައިން ލެޔާއެކު ހޮޑު އައިސްފައިވާ ކަމަށް މަޢުލޫމާތު ލިބިފައިވެއެވެ.

އެކަމާގުޅިގެން ތުއްތު ކުއްޖާގެ ޢާއިލާއިން ކުއްޖާ ވަގުތުން ހެލްތު ސެންޓަރަށް ގެންދިޔަ ނަމަވެސް، އޭރު އެ ކުއްޖާ ނިޔާވެފައިވާ ކަމަށް އެރަށު ހެލްތު ސެންޓަރުން ވަނީ ބުނެފައެވެ.

ކުއްޖާ ނިޔާވީ ފުއްޕާމެއަށް ކިރު އެޅިގެން ކަމަށް ޑޮކްޓަރު ވިދާޅުވާކަމަށް ތުއްތު ކުއްޖާ ބެލި ޑޮކްޓަރާ ހަވާލާދީ ރާއްޖޭގެ މީޑިއާތަކުގައި ވަނީ ރިޕޯޓްކޮށްފައެވެ.