ޓީޗަރުންގެ މަގާމުތަކަށް މުވައްޒަފުން ހޮވުމާއި އައްޔަންކުރުމުގެ އުސޫލަށް ބަދަލުތަކެއް ގެނެސްފިއެވެ.

ސިވިލް ސަރވިސް ކޮމިޝަން، ސީއެސްސީން އާންމުކޮށްފައިވާ ސަރކިއުލާގައި ބުނެފައިވަނީ ޓީޗަރުންގެ އޮނިގަނޑުގައިވާ ހުސް މަގާމުތަކަށް އިއުލާންކުރުމާއި މަގާމެއް ހުސްވުމުން ނުވަތަ، ހުސްވާނެކަން ކަށަވަރުވުމުން، އެ މަގާމަކަށް މުވައްޒަފަކު ހޯދުމުގެ މަސައްކަތް ކުރުމާއި, ޓީޗަރުންގެ ވަޒީފާގެ އޮނިގަނޑުގައިވާ މަގާމުތަކަށް އިޖާބަދީ ހުށަހަޅާ އެޕްލިކޭޝަންތައް ޕްރޮސެސް ކުރުމުގައި ޢަމަލު ކުރާނީ އެއުސޫލާ އެއްގޮތަށް ކަމަށެވެ.

ސީއެސްސީން ބުނީ, ޓީޗަރުންގެ މަގާމުތަކަށް އިއުލާންކުރާނީ ހުރިހާ ރޭންކެއްގެ ހުރިހާ ގްރޭޑްތައް ހިމަނައިގެންކަމަށާއި މަގާމުތަކަށް އިއުލާންކުރުމުގައި ޝަރުތުގެ ގޮތުގައި ބޭނުންކުރަންވާނީ، ޓީޗަރުންގެ ވަޒީފާގެ އޮނިގަނޑުގައި ބަޔާންކޮށްފައިވާ ޝަރުތުތައް ކަމަށެވެ.

އަދި ސްކްރީން ކުރުމުގެ މަސައްކަތް ކުރިޔަށްގެންދާނީ "ސިވިލް ސަރވިސް ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުސޫލުތައް 2021 "ގައި ބަޔާންކޮށްފައިވާ މިންގަނޑުގެ ތެރެއިންކަމަށް ވަނީ ބުނެފައެވެ.

މަގާމަށް އެންމެ ގާބިލު ފަރާތް ކަނޑައެޅުމުގައި ތައުލީމުގެ ބައިން މަގާމުގެ އަސާސީ ޝަރުތު ހަމަވާނަމަ، ކްރައިޓީރިއާގައި އަސާސީ ޝަރުތު ހަމަވުމުން ދިނުމަށް ކަނޑައަޅާފައިވާ ޕޮއިންޓު ދޭންވާނެކަމަށް ވަނީ ބުނެފައެވެ. އަދި ތަޖުރިބާ އަށް ކަނޑައަޅާފައިވަނީ 5 ޕޮއިންޓެވެ. ތަޖުރިބާއަށް މާކްސް ލިބޭނީ ކުރިމަތިލާ މަގާމާ ގުޅުންހުރި ދާއިރާއަކުން ލިބިފައިވާ ތަޖުރިބާއަށެވެ. އިންޓަރވިއު އަށް ކަނޑައަޅާފައިވަނީ 25 ޕޮއިންޓެވެ. އަދި ޕްރެކްޓިކަލްސް އަށް 35 ޕޮއިންޓް ކަނޑައަޅާފައިވެއެވެ.

23 ސެޕްޓެމްބަރ އިން ފެށިގެން އަމަލުކުރުމަށް ހަމަޖެހިފައިވާ މި އުސޫލުގެ ދަށުން މަގާމުތަކަށް އައްޔަންކުރުމުގައި ވަޒީފާއަށް އެދިފައިވާ މީހާއަށް ހުރިހާ ބަޔަކުން ލިބުނު ޕޮއިންޓުގެ ޖުމްލަ 55 އިންސައްތަ އަށްވުރެ މަތިވާންޖެހޭނެ ކަމަށް ސީއެސްސީން ވަނީ ބުނެފައެވެ.