ދިއެފްއެމްގެ ކުރީގެ ސީއީއޯ މަސްއޫދު ހިލްމީއަށް ހަމަލާދީ ޒަހަމްކޮށްލި މައްސަލައިގައި ހައްޔަރުކުރި މީހާ ދޫކޮށްލުމަށް ލ. ފޮނަދޫ މެޖިސްޓްރޭޓް ކޯޓުން ކުރި ހުކުމް ހައިކޯޓުން ބާތިލްކޮށްފި އެވެ.

މޯލްޑިވްސް މީޑިޔާގެ ކައުންސިލްގެ ކުރީގެ މެމްބަރު މަސްއޫދަށް ހަމަލާދިން މައްސަލާގައި ހައްޔަރުކުރި ލ. ފޮނަދޫ ދިލްކުސާގޭ، އަހުމަދު ސަމީމް ދޫކޮށްލަށް ކުރިހުކުމް ދައުލަތުން ހައިކޯޓުގައި އިސްތިއުނާފްކުރުމުން މައްސަލަ ބެއްލެވި ތިން ފަޑިޔާރުންގެ އިއްތިފާގުން ވަނީ ލ. ފޮނަދޫ މެޖިސްޓްރޭޓް ކޯޓުގެ އަމުރު ބާތިލްކޮށްފަ އެވެ. ހައިކޯޓުން މިމައްސަލާފައިކޮށްފައިވާ ހުކުމްގައި ބުނެފައިވަނީ ލިބިފައިވާ ހެއްކާ ގަރީނާތަކަށް ބަލައި އެމީހާ ބަންދުގައި ބަހައްޓަން އެމައްސަލާގައި މިހާރު ދައުވާ އުފުލިފައިވާ ކޯޓުން ގޮތެއް ނިންމަން ޖެހޭ ކަމަށެވެ.

މިހާރު އަމިއްލަ ވިޔަފާރީގައި ހަރަކާތްތެރިވަމުންދާ މަސްއޫދަށް ހަމަލާދިން މީހާގެ މައްޗައް ދައުލަތުން ދައުވާ އުފުލާފައި ވަނީ ޤާނޫނު ނަންބަރު 17/2010 ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ނުވަ ވަނަ މާއްދާގެ (ހ) އާއި އެ މާއްދާގެ (ށ) ދަށުންނެވެ. މި ކުށުގެ އަދަބަކީ 7 އަހަރާއި 10 އަހަރާއި ދެމެދަށް ޖަލައްލުމެވެ.

މި މީހާއަކީ މިދިޔަ ޑިސެމްބަރު މަހު ލާމް އަތޮޅުގައި އޮންނަ މަސްއޫދު ކާރުގައި ރޯކޮށްލި މައްސަލާގައިވެސް ފުލުހުން ތަހްގީގް ހިންގަމުންދާ ފަރާތެވެ. އެމައްސަލާގައި ވެސް ފުލުހުން ވަނީ އަހުމަދު ސަމީމްގެ ފޯނު ހިފަހައްޓާފަ އެވެ.

އާއްމުވެފައިވާ ވީޑިއޯ ފެންނަ ގޮތުން ކަޅުކުލައިގެ ޕީސީއާރު ސައިކަލެއްގައި އައި މީހަކު މަސްއޫދަށް ހަމަލާދީ ޒަހަމްކޮށްލާފައިވަނީ ދަގަނޑު ބުރިއަކުން ނެވެ. ހަމަލާ ދިނުމުގެ ސަބަބުން ލިބުނު ޒަހަމްތަކަށް މަސްއޫދު ވަނީ އެރޭ ގަން ރީޖަނަލް ހޮސްޕިޓަލުން ފަރުވާވެސް ހޯދާފަ އެވެ.