މޯލްޑިވްސް ޕޮލިސް ސަރވިސްގެ އިސް މަގާމުތަކެއްގައި ތިއްބައި ވަޒީފާއިން ވަކިކުރަން ނިންމި ފަސް އޮފިސަރުން ސިވިލްކޯޓަށް ހުށައެޅި މައްސަލާގައި ޑިސްޕިއުޓް މަރުޙަލާގައި ޙައްލެއް ނުލިބުމުން މައްސަލަ ޝަރީޢަތަށް ފޮނުވައިފިއެވެ.

މިމައްސަލަ ކޯޓަށް ހުށަހަޅާފައިވަނީ މަގާމުން ވަކިކުރުމަށް ނިންމި 7 އޮފިސަރުންގެ ތެރެއިން 5 އޮފިސަރެއްގެ ފަރާތުން، ދިވެހި ޗެމްބާސް ލޯ ފާމުންނެވެ. އެމައްސަލައިގައި މިއަދު ހެނދުނު 9:00 ގައި އޮތް ޑިސްޕިއުޓް މަރުހަލާގައި ދައުލަތުން އިތުރު ވަގުތަށް އެދުމުން މައްސަލަބެއްލެވި ޤާޟީ ވަނީ މައްސަލައިގެ ބާވަތުން އިތުރުވަގުތު ދެވެން ނެތްކަމަށް ނިންމައި މައްސަލަ ޝަރީޢަތަށް ފޮނުވުމަށް ނިންމާފައެވެ. ޑިސްޕިއުޓް މަރުޙަލާއަކީ ޝަރީޢަތުގެ ބޭރުން މައްސަލަ ޙައްލުކުރުމަށް ދެވޭ ފުރުސަތެކެވެ.

ކޯޓަށް މައްސަލަ ހުށަހަޅާފައިވާ 5 އޮފިސަރުންނަކީ އެސިސްޓަންޓް ކޮމިޝަނަރ އޮފް ޕޮލިސް އަޙްމަދު މުޙައްމަދު، އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ޖަމްޝީދު، ސުޕްރިންޓެންޑެންޓް އޮފް ޕޮލިސް އިސްމާޢީލް ޝަމީމް އާދަމް، ޗީފް ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް އަދި ޗީފް ސުޕްރިންޓެންޑެންޓް އޮފް ޕޮލިސް މުޙައްމަދު ދާއޫދުއެވެ.

މި 5 އޮފިސަރުން މަޤާމުގައި ބޭތިއްބުމަށް ޕޮލިސް ބޯޑަށް ފެންނަކަމަށް 9 އޮގަސްޓު 2021 ގައި ވަނީ ނިންމާފައެވެ. އަދި މި 5 އޮފިސަރުންގެ ތެރެއިން އެސިސްޓަންޓް ކޮމިޝަނަރ އޮފް ޕޮލިސް އަޙްމަދު މުޙައްމަދު އަދި އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ޖަމްޝީދަށް ވަނީ ޕޮލިސް ބޯޑުގެ ނިންމުމާއި އެއްގޮތަށް އެދެއޮފިސަރުން 2021 އޮކްޓޫބަރު 10 ވަނަ ދުވަހު މަޤާމުން ވަކިކުރުމަށް ދޭ ނޯޓިސް ދީފައެވެ.

ދިވެހި ޗެމްބާސްއިން މިމަހުގެ 6 ވަނަ ދުވަހު ބުނީ ވަކިކުރަން ނިންމާފައިވާ އޮފިސަރުންނާއިމެދު ކަންކުރެވިފައިވާ ގޮތުގެ މައްޗަށް ބަލާއިރު، މި 5 އޮފިސަރުންކުރެ އެއްވެސް އޮފިސަރަކަށް އަމިއްލަ ދިފާޢުގައި ބަސްބުނުމަށާއި، ޖަވާބުދާރީވުމުގެ ފުރުޞަތު ލިބިދީފައިނުވާ ކަމަށެވެ.

އަދި އެކަމުގެ ސަބަބުން މިއޮފިސަރުންގެ ގެއްލިފައިވާ ދުސްތޫރީ އަދި ޤާނޫނީ ޙައްޤުތަކުގެ ޙިމާޔަތުގައާއި، މި އޮފިސަރުންނާމެދު ކަންކުރެވިފައިވާ އިޖުރާއަތަށް ބަލާއިރު، ޤާނޫނީގޮތުން ބޮޑެތި ފުށުއެރުންތަކެއް އިޖުރާއީގޮތުން އެބަހުރިކަމަށެވެ. އެހެންކަމުން މި 5 އޮފިސަރުންގެ ފަރާތުން ސިވިލް ކޯޓަށް މައްސަލައެއް ހުށަހަޅާފައިވާކަމަށް ދިވެހި ޗެމްބާސްއިން ބުނެއެވެ.

ދިވެހި ޗެމްބާސްއިން ބުނީ ސިވިލް ކޯޓަށް ހުށަހަޅާފައިވާ މައްސަލައިގައި ޝަރީޢަތުން ގޮތެއް ކަނޑައެޅުއްވުމުގެ ކުރިން މިފަރާތްތައް ވަޒީފާއިން ވަކިކުރުމާގުޅޭ އެއްވެސް ކަމެއް ނުކުރުމަށާއި، މިފަރާތްތަކުގެ ވަޒީފާ އަދާކުރުމުގެ ޙައްޤަށް ހުރަސްއެޅިދާނެ އެއްވެސް ކަމެއް ނުކުރުމަށް ދިވެހި ފުލުހުންގެ ޚިދުމަތަށާއި، ޕޮލިސް ބޯޑް އަދި ކަމާގުޅޭ އެންމެހާ ފަރާތްތަކުގެ މައްޗަށް އަމުރުކޮށްދިނުން އެދި ވަގުތީ އަމުރަކަށްވެސް އެދިފައިވާކަމަށެވެ.