ނޫސްވެރިކަމުގެ އިނާމުގެ މައްސަލަ ސިވިލް ކޯޓުން ބޭރުކޮށްލައިފިއެވެ.

މޯލްޑިވްސް މީޑިއާ ކައުންސިލުން ބާއްވަމުން އަންނަ ނޫސްވެރިކަމުގެ އިނާމު ދިނުމުގައި ޢަމަލުކުރަމުންދަނީ އުސޫލާ ޚިލާފަށް ކަމަށްބުނެ، އެ މައްސަލަ ސިވިލް ކޯޓަށް ހުށައެޅުމުން މިއަދު ބޭއްވި މައްސަލައިގެ އަޑުއެހުމުގައި އެމައްސަލަ ނުބެލޭނެކަމަށް ނިންމައި މައްސަލަ ބޭރުކޮށްލައިފިއެވެ.

އެ މައްސަލަ ހުށައަޅާފައިވަނީ ސިވިލްކޯޓުގެ އަވަސް ނިޔާގެ މައްސަލަބަލާ ސެކްޝަނަށެވެ. އެހެންކަމުން މައްސަލަ ބައްލަވާ ޤާޟީ މިއަދު ވިދާޅުވެފައިވަނީ އެ މައްސަލަ ކުރިއަށް ގެންދެވޭނީ ސިވިލް ކޯޓުގެ އިދާރީ މައްސަލަބަލާ ސެކްޝަނަށް ކަމަށެވެ.



މިމައްސަލަ ނޫސްވެރިންގެ ފަރާތުން ޝުނާނާ އެންޑް ކޯ އެލްއެލްޕީ ލޯ ފާމުން ސިވިލް ކޯޓަށް ހުށަހަޅާފައިވަނީ މިއަހަރުގެ ފެބްރުއަރީ 22 ގައި މީޑިއާ ކައުންސިލުން ނެރެފައިވާ އުސޫލާ ޚިލާފަށް އިނާމު ދިނުމުގެ ކަންތައްތައް ކުރިއަށް ގެންދާތީ ކަމަށް ބުނެއެވެ.

މި މައްސަލާގައި ނޫސްވެރިންގެ މައިގަނޑު ކަންބޮޑުވުމަކީ، ބްރޯޑްކާސްޓިން މީޑިއާތަކާއި، އޮންލައިން މީޑިއާތަކުގެ ނޫސްވެރިންނަށް ވަކި ޕެނަލްއަކުން މާކްސް ދިނުމަށްފަހު، ދެ ބައި އެއްކޮށްލައިގެން އިނާމް ދިނުމަށް ނިންމުމެވެ. އެކަމާ ގުޅިގެން ނޫސްވެރިން ކަންބޮޑުވުން ފާޅުކުރަމުންދާއިރު، އެމައްސަލާގައި ރައްޔިތުންގެ މަޖިލީހާއި، އެމްއެމްސީގެ އިނާމުދޭ ކޮމިޓީގެ މުގައްރިރަށް ވެސް ވަނީ ސިޓީއެއް ހުށައަޅާފައެވެ.

އަދި ގިނަ އަދަދެއްގެ ނޫސްވެރިންގެ ކަންބޮޑުވުންތައް ހުރެ، އެއަށް ހައްލެއް ހޯދުމަށް އެއްވެސް މަސައްކަތެއް ނުކޮށް ބާއްވާ ނޫސްވެރިންގެ އިނާމު ދިނުމުގެ ހަފުލާއެއްގައި ރައީސް ޞާލިޙް ބައިވެރިވެ ވަޑައިގަންނަވާތީ އެކަމާ ކަންބޮޑުވުން ފާޅުކޮށް 75 ނޫސްވެރިން ސޮއިކޮށް ރައީސަށް މިއަދުވަނީ ސިޓީއެއް ވެސް ފޮނުވާފައެވެ.

އޭގެ އިތުރުން މި އިނާމަށް މި އަހަރު ކުރިމަތިލި 10 މީޑިއާގެ ތެރެއިން ހަތް މީޑިއާއަކުން އިނާމުދޭ ގޮތާމެދު ކަންބޮޑުވުން ފާޅުކޮށް، އެގޮތަށް އިނާމު ދިނުން ކުރިއަށް ނުގެންދިއުމަށް މޯލްޑިވްސް މީޑިއާ ކައުންސިލަށް ވަނީ ޕެޓިޝަނެއް ވެސް ހުށަހަޅައިފަ އެވެ.