ހިޔާ ފްލެޓްތަކަށް ގޭސް ފޯރުކޮށްދިނުން މޯލްޑިވްސް ގޭސް ކުންފުންޏާ ޙަވާލުކޮށްފިއެވެ.

ހިޔާ ފްލެޓްތަކަށް ގޭސް ފޯރުކޮށްދިނުމުގެ ވަރުގަދަ ސިސްޓަމެއް ގާއިމުކުރުމަށް މޯލްޑިވްސް ގޭސް ކުންފުންޏާ ހައުސިންގ ޑިވޮލޮޕްމަންޓް ކޯޕަރޭޝަން، އެޗް.ޑީ.ސީން މިއަދު ޙަވާލުކުރި މި މަސައްކަތަކީ ސޯޝަލް ހައުސިންގ މަޝްރޫއެއްގައި ރާއްޖޭގައި މިފަދަ މަސައްކަތެއް ކުރާ ފުރަތަމަ ފަހަރެވެ.

މި ސިސްޓަމް ގާއިމު ކުރަނީ ހިޔާ ފްލެޓްތަކަކީ ނިސްބަތުން އުސް އިމާރާތްތަކަކަށްވާތީ، ލިފްޓުތަކުގައި ގޭސް ފުޅި ގިނަ ފަރާތްތަކަކުން އުފުލުމަކީ އެންމެ ރައްކާތެރިކަމަކަށްނުވާތީއާއި ގޭސް ފުޅި އަރުވާ ބޭލުމުގައި އާއްމު ރައްޔިތުންނަށް ދިމާވެދާނެ ތަކުލީފު ކުޑަކުރުމަށްޓަކާ ކަމަށް އެޗް.ޑީ.ސީން ހާމަކުރެއެވެ.

މި މަސައްކަތް ކުރުމަށް ހަމަޖެހިފައިވަނީ ކޮންމެ ޓަވަރެއްގެ ތިރީގައި ސްޓޯރޭޖް ޔުނިޓްތަކެއް ގާއިމުކޮށްގެން އެމް.އެން.ޑީ.އެފްގެ އުސޫލުތަކާ އެއްގޮތްވާގޮތުގެ މަތިން ކަމަށް އެޗް.ޑީ.ސީން ބުނެއެވެ. މި މަސައްކަތް އަންނަ އަހަރުގެ ދެވަނަ ކުއާޓާގައި ނިންމުމަށް ހަމަޖެހިފައިވާއިރު، މި ހިދުމަތް ދިނުމަށް މޯލްޑިވްސް ގޭހާއި ހަވާލުކޮށްފައިވަނީ 20 އަހަރު ދުވަހުގެ މުއްދަތަކަށެވެ.

މިއަދު ބޭއްވި ސޮއިކުރުމުގެ ރަސްމިއްޔާތުގައި އެޗް.ޑީ.ސީގެ ފަރާތުން މި އެއްބަސްވުމުގައި ސޮއިކުރެއްވީ މެނޭޖިންގ ޑިރެކްޓަރ ސުހެއިލް އަހްމަދެވެ. މޯލްޑިވްސް ގޭހުގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމެވެ.