ހަންގޭރީން ރާއްޖެއަށް ކޮންމެ އަހަރަކު 15 ސްކޮލަރޝިޕް ހަމަޖައްސައިދީފިއެވެ.

ދިވެހި ސަރުކާރާއި ހަންގޭރީ ސަރުކާރާއި ދެމެދު މަތީ ތަޢުލީމާ ގުޅޭ މެމޮރެންޑަމް އޮފް އަންޑަރސްޓޭންޑިންގ (އެމްއޯޔޫ) އެއްގައި މިއަދު ސޮއިކޮށްފައިވާއިރު މި އެމްއޯޔޫގެ ދަށުން ހަންގޭރީ ސަރުކާރުގެ ފަރާތުން ދިވެހިރާއްޖެއަށް ހަތަރު އަހަރުގެ މުއްދަތަށް، ކޮންމެ އަހަރަކު 15 ސްކޮލަރޝިޕް ދިނުމަށް ވަނީ ހަމަޖެހިފައެވެ.

މި އެމްއޯޔޫގެ ދަށުން މިއަހަރަށް ކަނޑައެޅިފައިވަނީ، ފުރަތަމަ ޑިގްރީގެ 6 ފުރުސަތާއި މާސްޓަރސް ޑިގްރީގެ 7 ފުރުސަތާއި ޕީ.އެޗް.ޑީގެ 2 ފުރުސަތެވެ. މި ސްކޮލަރޝިޕްތަކުގެ ދަށުން ދަރިވަރުންގެ ދެކޮޅު ޓިކެޓް ޚަރަދު ފިޔަވައި ހުރިހާ ޚަރަދެއް ހަމަޖައްސާނީ ހަންގޭރީ ސަރުކާރުންނެވެ. ޓިކެޓްގެ ޚަރަދު ހަމަޖައްސާނީ ދިވެހި ސަރުކާރުންނެވެ.

މި އެމްއޯޔޫގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ޙަސަނެވެ. ހަންގޭރީ ސަރުކާރުގެ ފަރާތުން ސޮއިކުރެއްވީ އެ ޤައުމުގެ މިނިސްޓްރީ އޮފް ފޮރިން އެފެއާޒް އެންޑް ޓްރޭޑްގެ ސްޓޭޓް ސެކްރެޓަރީއެވެ.