ތިލަފުށީ ބިންތައް ޤަވާއިދާ ޚިލާފަށް ބޭނުންކުރާނަމަ ފިޔަވަޅު އަޅާނެކަމުގެ އިންޒާރު ހައުސިންގ ޑިވެލޮޕްމަންޓް ކޯޕަރޭޝަނުން ދީފިއެވެ.

އެޗްޑީސީން މިރޭ ނެރެފައިވާ ބަޔާނެއްގައި ބުނެފައިވަނީ، ކ.ތިލަފުށްޓަކީ މާލެ ސަރަޙައްދުގައި، އެންމެ ފުޅާ ދާއިރާއެއްގައި ސިނާޢީ މަސައްކަތް ކުރަމުންގެންދާ، އަދި ގްރޭޓަރ މާލޭ

އޭރިއާގެ ވިޔަފާރި ހަބެއްގެ ގޮތުގައި ގޮތުގައި ބޭނުންކުރަމުންގެންދާ، ތަފާތު އެތައް ވިޔަފާރިއެއް ހިންގާ ރަށެއް ކަމަށެވެ.

އެ ރަށުގެ ބިން ވަނީ އެކިއެކި ވިޔަފާރިތަކަށް ކުލީ ބިމުގެ ގޮތުގައި ދޫކުރެވިފައިކަމާއި، އެ ބިންތަކަކީ އެތަންތާންގައި ވިޔަފާރިކޮށް ރާއްޖޭގެ އިޤްޠިޞާދަށާއި ވިޔަފާރިތަކަށްވެސް ކުރިއެރުން ގެނެސްދިނުމަށްޓަކައި، އެކިއެކި ޞިނާޢީ މަސައްކަތްތަކަށް ޚާއްޞަ ކުރެވިފައިވާ ބިންތަކެއް ކަމަށް އެޗްޑީސީގެ ބަޔާނުގައިވެއެވެ.

އެޗްޑީސީން ބުނީ ތިލަފުށިން އެކި ބޭނުންތަކަށް ބިން ދޫކުރެވެނީ ދެފަރާތުގެ ދެމެދުގައި އެއްބަސްވުމެއްގެ ތެރެއިން ކަމަށާއި ނަމަވެސް، ބައެއް ފަރާތްތަކުން އެއްބަސްވުމާއި ޚިލާފަށް އެކި އެކި ކަންކަން ކުރަމުންގެންދާތީ އެކަންކަން އެގޮތަށް ނުކުރުމަށް ތަކުރާރުކޮށް އެފަރާތްތަކަށް އަންގަމުންދާ ކަމަށެވެ.

އަދި އެފަދަ ޢަމަލުތަކުގެ ސަބަބުން ޢާއްމު މަސްލަޙަތު ގެއްލި، އެއްފަރާތުން ހިންގާ ޢަމަލެއްގެ ސަބަބުން އަނެއްފަރާތުގެ މަސައްކަތަށް ގެއްލުންވާފަދަ ކަންތައްތައްވެސް ހިމެނޭތީ އެފަދަ ކަންކަން އެއްވެސް ފަރާތަކުން ނުކުރުމަށް އިލްތިމާސްކުރާ ކަމަށެވެ.

މީގެ އިތުރުން އެފަދަ ޢަމަލުތައް ތަކުރާރު ކުރާނަމަ އެއްބަސްވުމުގެ ތެރެއިން ފިޔަވަޅު އަޅާނެކަމުގެ އިންޒާރު އެޗްޑީސީން ވަނީ ދީފައެވެ.