އިންޑިއާއާއެކު ވެފައިވާ އެއްބަސްވުންތައް ދެން އަންނަ ވެރިކަމެއްގައި ދެމެހެއްޓުން ލާޒިމު ނުވާނެ ކަމަށް 2023 ވަނަ އަހަރުގެ ރިޔާސީ އިންތިޚާބުގައި ވާދަކުރަށްވާނެކަން އިޢުލާނު ކުރަށްވާފައިވާ ޢުމަރު ނަސީރު މިއަދު ވިދާޅުވެއްޖެއެވެ.

ރައީސް ޢަބްދުﷲ ޔާމީންގެ ސަރުކާރުގައި ދާޚިލީ ވަޒީރުކަން ކުރެއްވި ޢުމަރު ނަސީރު މިއަދު ވިދާޅުވީ، ދިވެހިރާއްޖެއާއި އިންޑިއާއާއި ދެމެދުގައި ސިއްރުން ހަދާފައިވާ އަސްކަރީ އެއްބަސްވުންތައް ހާމަކުރަނީ ކަމަށް ބުނެ، މިނިސްޓްރީ އޮފް ޑިފެންސްގެ ފަރާތުން ރައްޔިތުންގެ މަޖިލީހުގެ 241 ކޮމެޓީގައި ދެއްވި ޕެރެޒެންޓޭޝަން ތަކާއި ސިއްރު ކޮށްގެން ދެއްކެވި ވާހަކަ ތަކަކީ ޤާނޫނީ ގޮތުން ބާރު ލިބިފައިނެތް އެއްބަސްވުން ތަކެއްގެ މަތިއޮމާންކުރުމަށް ކުރެވިގެންދިޔަ ކަމެއް ކަމަށެވެ.

އެގޮތުން ޤާނޫނު އަސާސީގެ 251 ވަނަ މާއްދާގެ (ނ) ގައި ބުނާ ގޮތަށް ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ ދިވެހިރާއްޖޭގެ އެއްވެސް ސަރަޙައްދެއް އަސްކަރީ ބޭނުމަކަށް ބޭރުގެ ބަޔަކަށް ނުދެވޭނެ ކަމަށް ޢުމަރު ވިދާޅުވިއެވެ. އަދި އެއްބަސްވުންތައް ހާމަކޮށް ރައްޔިތުންގެ މަޖިލީހުން ފާސްނުކުރާނަމަ އެފަދަ ކޮންމެ އެއްބަސްވުމަކީ ޤާނޫނީ އިމުގެ ބޭރުންކުރެވޭ ބާތިލް އެއްބަސްވުން ތަކެއްކަމަށް ޢުމަރު ވިދާޅުވިއެވެ.

ޢުމަރ ވިދާޅުވީ އިންޑިއާއާއެކު މި ސަރުކާރުން ވެފައިވާ އެއްބަސްވުންތަކަކީ ދެން އަންނަ ވެރިއެއްގެ މައްޗަށް ދެމެހެއްޓުން ލާޒިމްވާނޭ އެއްބަސްވުން ތަކެއް ނޫންކަމަށެވެ.

"ކ. އުތުރު ތިލަފަޅާ، ހދ. ހަނިމާދޫ އާއި ސ. ގަމާއި، ލ. ކައްދޫ އިން ބަޔެއް އިންޑިއާގެ އަސްކަރިއްޔާގެ ފަރާތުން މިހާރު ބޭނުން ކުރަމުން ދަނީ އަސްކަރީ ބޭނުމަކަށް ނޫންކަމަށް ސަރުކާރުން މާނަ ކުރައްވާނަމަ އެކަމުގައި އަމަލު ކުރަންވާނީ މަދަނީ މިންގަޑަކުންނެވެ. އެފަދަ ހާލަތުގައި ޤާނޫނު އަސާސީގެ 16 ވަނަ މާއްދާގެ (ހ) ގައިވާ މާއްދާގައިވާ ގޮތުގެ މަތިން މިނިވަން ދިމިޤްރާތީ މުޖްތަމަޢެއްގައި އޮންނަންޖެހޭ ގޮތަށް، މި އެއްބަސްވުންތައް ސޮޔާއެކު އޮތްގޮތަށް އާންމުކޮށް ހާމަކުރަން ޖެހެއެވެ. ޤާނޫނު އަސާސީގެ 16 ވަނަ މާއްދާއަށް ނުވަތަ 251 ވަނަ މާއްދާއަށް އަމަލު ކުރަން ޖެހެއެވެ." ޢުމަރު ނަސީރު ވިދާޅުވެފައިވެއެވެ.

ޢުމަރު ވިދާޅުވީ އިންޑިޔާގެ އަސްކަރީ ސިފައިން 2010 ވަނަ އަހަރު ރާއްޖެ އަށް ފޭބުމަށްފަހު މިވީ 11 އަހަރުގެ ތެރޭގައި އުފެދުނު 4 ސަރުކާރަށްވެސް މި ސިފައިން ރާއްޖޭން ފޮނުވާލެވިފައި ނެތުމަކީ ދިވެހިން ވަރަށް ފުންކޮށް ވިސްނަންޖެހޭ ކަމެއް ކަމަށެވެ. އަދި އިންޑިޔާގެ ސިފައިން އަނބުރާ އެމީހުންގެ ޤައުމަށް ފޮނުވާލެވޭނީ ދެން އަންނަ ވެރިޔަކީ ފަސްބައި ސާފު، ޖެހިލުންކުޑަ އަދި ވަތަނީ ވެރިޔަކަށްވެގެން ކަމަށް 2023ގެ އިންތިޚާބުގައި ވާދަކުރަށްވާ ޢުމަރު ވިދާޅުވިއެވެ.

އިންޑިއާ އާއެކު ސަރުކާރުން ވެފައިވާ ޔޫޓީއެފް އެއްބަސްވުން އާއްމުކުރުމަށް އިދިކޮޅު ފަރާތްތަކުން ތަކުރާރުކޮށް ގޮވާލަމުންދިޔަނަމަވެސް ސަރުކާރުން އެކަމަށް އިޖާބައެއް ނުދެއެވެ. ނަމަވެސް އެމްއެންޑީއެފާއި ޑިފެންސް މިނިސްޓްރީން ދާދިފަހުން ވަނީ އިތުރު ތިލަފަޅު އެއްބަސްވުމުގައި ހިމެނޭ ކަމަށްބުނާ މައުލޫމާތު ތަކެއް ރައްޔިތުންގެ މަޖިލީހާ ހިއްސާކޮށްފައެވެ.