ރައްޔިތުންގެ އުންމީދުތައް އަދިވެސް ގުޅިފައި ވަނީ އެމްޑީޕީގެ ވެރިކަމަކާ ކަމަށް އެޕާޓީން ބުނެފިއެވެ.

ރައީސް ޞާލިޙްގެ ވެރިކަމަށް 3 އަހަރު ފުރުމުގެ މުނާސަބަތުގައި ނެރެފައިވާ ބަޔާނުގައި އެމްޑީޕީން ބުނީ، ރައްޔިތުންގެ އުންމީދުތައް އަދިވެސް ގުޅިފައި ވަނީ އެ ޕާރޓީއާއި އެޕާރޓީގެ ވެރިކަމަކާ ކަމަށެވެ. އެގޮތުން ކޯވިޑް-19 ގެ ބޮޑެތި ގޮންޖެހުންތަކާ އެކުވެސް، ރާއްޖޭގެ އެކި ކަންކޮޅުތަކުގައި އަސާސީ ޚިދުމަތްތައް ފޯރުކޮށްދެއްވުމުގެ މަސައްކަތްތަކާއި މަޝްރޫއުތައް ސަރުކާރުން ބާރަށް ކުރިއަށް ގެންދަވާކަން ހިތްހަމަޖެހުމާއެކު ފާހަގަކޮށް، ރައީސް އިބްރާހިމް މުޙައްމަދު ޞާލިޙަށާއި ސަރުކާރަށް އެމްޑީޕީން ވަނީ މަރުޙަބާ ކިޔާފައެވެ.

2018 ވަނަ އަހަރު ރާއްޖޭގައި ބޭއްވި ރިޔާސީ އިންތިޚާބުގައި ދިވެހި ލޮބުވެތި ރައްޔިތުން، ރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް ދިވެހިރައްޔިތުންގެ ޑިމޮކްރެޓިކް ޕާރޓީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް އިންތިޚާބުކުރައްވައި، އެމް.ޑީ.ޕީ.ގެ ވެރިކަމެއް ޤާއިމުކުރެއްވިތާ މިއަދަށް 3 އަހަރު ފުރޭހިނދު، ރައީސް އިބްރާހިމް މުޙައްމަދު ޞާލިޙަށާއި ސަރުކާރަށާއި ރައްޔިތުންނަށް އެމްޑީޕީން ވަނީ ހޫނު މަރުޙަބާއެއް ދަންނަވާފައެވެ.

2018 ވަނަ އަހަރުގެ ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުޙައްމަދު ޞާލިޙް އިންތިޚާބު ކާމިޔާބުކުރައްވާފައިވަނީ އޭރުގައި އޮތް ޚުދުމުޚުތާރު ވެރިކަން ބަލިކުރައްވައި ވަރަށް ބޮޑު އަޣުލަބިއްޔަތަކުންކަން އެމްޑީޕީން ވަނީ ފާހަގަކޮށްފައެވެ.

"އެފަދަ ކާމިޔާބެއް މި ޕާރޓީއަށާއި މި ޕާރޓީގެ ރިޔާސީ ކެންޑިޑޭޓަށް ރައްޔިތުން ދެއްވި މައިގަނޑު ސަބަބަކީ މި ޕާރޓީންނާއި އެއިރުގެ ރިޔާސީ ކެންޑިޑޭޓް އިބްރާހީމް މުޙައްމަދު ޞާލިޙް ވެވަޑައިގަތް ވަޢުދުތަކާއި ގެންގުޅުއްވާ ތަޞައްވަރުގެ ސަބަބުންކަމަށް ދެކެމެވެ. އަދި އަނިޔާވެރިކަމާއި ޚުދުމުހުތާރު ވެރިކަމުގެ ގޮތްތަކަކުން ރައްޔިތުން މިންޖުވުމަށް ނިންމެވި ނިންމެވުމެއްގެ ސަބަބުންކަމަށް ދެކެމެވެ." އެމްޑީޕީގެ ބަޔާނުގައިވެއެވެ.

އެމްޑީޕީން ބުނީ ރިޔާސީ އިންތިޚާބަށްފަހު 2019 ގައި ބޭއްވި ރައްޔިތުންގެ މަޖިލީހުގެ އިންތިޚާބުގައި ވެސް ރައްޔިތުން އެމްޑީޕީއަށް ނުހަނު ބޮޑަށް އިތުބާރުކުރައްވައި ރައްޔިތުންގެ މަޖިލީހުގެ ސުޕަރމެޖޯރިޓީ ދެއްވާފައިވާކަމަށެވެ.

"މި ސަރުކާރުގެ 3 އަހަރު ދުވަހުގެ މުއްދަތުގެ ތެރޭގައި ގިނަ ބޮޑެތި ބަދަލުތަކެއް ރައްޔިތުންނަށާއި ރާއްޖެއަށް ގެނެސްދެއްވާފައިވާކަން އުފަލާއެކު ފާހަގަކޮށް ރައީސް އިބްރާހިމް މުޙައްމަދު ޞާލިޙަށާއި ސަރުކާރަށް މަރުޙަބާ ދަންނަވަމެވެ. މި މުއްދަތުގެ ތެރޭގައި، ސަރުކާރުން ރައްޔިތުންނަށް ބިރުދެއްކުމާއި އަނިޔާވެރިކަން އިސްކުރުން ވަނީ ނިމުމަކަށް ގެންނަވާފައެވެ. ޑިމޮކްރެސީއާއި ޤާނޫނުގެ ވެރިކަމަށް އަހުމިއްޔަތުކަންދެވި، ހެޔޮ ވެރިކަމުގެ ނިޒާމެއް ޤާއިމުކުރެވިފައިވެއެވެ." ބަޔާނުގައި ފާހަގަ ކޮށްފައިވެއެވެ.

އޭގެ އިތުރުން ޖުޑިޝަރީ އިސްލާޙުކުރެއްވުމުގެ މަސައްކަތުގެ ތެރެއިން އައު ސްޕްރީމް ކޯޓެއް އައްޔަނުކުރައްވައި، ހެޔޮ ބަދަލުތަކެއް ގެންނަވަމުންދާކަން ވަނީ ފާހަގަކޮށްފައެވެ. ހަމައެއާއެކު މިނިވަން މުވައްސަސާތަކަށް ނުފޫޒުފޯރުވުމުގެ ސަޤާފަތް ބަދަލުކުރައްވައި، އެތަންތަން މިނިވަންކަމާއި މުސްތަޤިއްލުކަމާއެކު މަސައްކަތްކުރުމަށް ސަރުކާރު ހުރަހަކަށް ނުވާކަމަށް އެމްޑީޕީގެ ބަޔާނުގައިވެއެވެ. އަދި ސިޔާސީ ޙަރަކާތްތަކަށާއި މީޑިއާގެ މިނިވަންކަމަށް ޖާގަދެވި، އެކަންކަން ކަށަވަރުކޮށްދެއްވަމުން ގެންދަވާ ކަމަށާއި، ރައްޔިތުން ބާރުވެރިކުރުވުމަށާއި ލާމަރުކަޒުކުރުމަށް ބޮޑެތި އިސްލާޙީ ބަދަލުތަކެއް މި 3 އަހަރުގެ ތެރޭގައި ގެންނަވާފައިވާކަން އެމްޑީޕީން ވަނީ ފާހަގަކޮށްފައެވެ.

އެމް.ޑީ.ޕީން ވަނީ މި ސަރުކާރުގައި އދ. ގެ 76 ވަނަ އާންމު މަޖިލީހުގެ ރިޔާސަތަށް ރާއްޖޭގެ ޚާރިޖީ ވަޒީރު ޢަބްދުﷲ ޝާހިދު އިންތިޚާބުވެވަޑައިގެންފައިވާކަން ފަޚުރުވެރިކަމާއެކު ފާހަގަކޮށްފައެވެ. އަދި މި 3 އަހަރުގެ ތެރޭގައި ރާއްޖެއާއި ބައިނަލްއަޤުވާމީ ދުނިޔެއާ ގުޅުން ވަރަށް ބޮޑަށް ބަދަހިވަމުންގޮސްފައިވާކަން ވެސް ފާހަގަކޮށްފައިވެއެވެ.

އެމްާޑީޕީގެ ބަޔާން ނިންމަވާލަމުން ބުނެފައިވަނީ ސަރުކާރުގެ ބާކީ އޮތް އަހަރުތަކުގައި ރައްޔިތުންގެ އުއްމީދުތަކާ އެއްމިންވަރަށް ކަންކަން ޙާޞިލުކުރައްވަމުން ގެންދަވާނޭކަމުގައި ޔަޤީންކުރާ ކަމަށެވެ.