ކުރިއެކޭވެސް އެއްގޮތަށް 24 ގަޑިއިރު ޕާސްޕޯޓަށް އެދެވޭ ގޮތަށް ބަދަލުކޮށްފައިވާ ކަމަށް މޯލްޑިވްސް އިމިގްރޭޝަނުން ހާމަކޮށްފިއެވެ.

އިމިގްރޭޝަނުން އިމުގާ ޕޯޓަލް މެދުވެރިކޮށް ޕާސްޕޯޓަށް އެދި ހުށަހެޅުމަށް ހުޅުވާލީ މިދިޔަ އަހަރުގެ ޖުލައި 23 ވަނަ ދުވަހުއެވެ. އަދި ޕާސްޕޯޓަށް އެދުމުގެ ވަގުތަށް ބަދަލުގެނެސްފައިވަނީ މި މަހުގެ ހަތަރުވަނަ ދުވަހު އެވެ.

އިމިގްރޭޝަނުން މިއަދު ބުނީ އިމިގްރޭޝަންގެ އިމުގާ ޕޯޓަލްއަށް ގެންނަން ފެށި ބަދަލުގެ މަސައްކަތް މިހާރު ނިމިފައިވާ ކަމަށެވެ. އެހެންކަމުން މިހާރު ކުރިއެކޭ އެއްގޮތަށް އޮންލައިންކޮށް 24 ގަޑިއިރު ޕާސްޕޯޓަށް އެދި ހުށަހެޅޭނެ ކަމަށާއި ޕާސްޕޯޓަށް އެދި ހުށަހަޅާ ތަރުތީބުން އެޕްލިކޭޝަންތައް ޕްރޮސެސް ކުރާނެ ކަމަށް އެމިގްރޭޝަނުން ވަނީ ބުނެފައެވެ.

އިމިގްރޭޝަނުން އިތުރަށް ބުނީ، ޕާސްޕޯޓު ދޫކުރާނީ ފައިސާ ދައްކާތާ މަސައްކަތު 24 ގަޑިއިރު ތެރޭގައި ކަމަށެވެ. ޕާސްޕޯޓު ބަލައި ދާން ޖެހެނީ އެޕޮއިންޓުމެންޓު ދޫކޮށްފައިވާ ގަޑިއަކަށެވެ.

ކުރިއެކޭ އެއްގޮތަށް، މިއަދުން ފެށިގެން 24 ގަޑިއިރު ޕާސްޕޯޓަށް އެދި ހުށަހެޅޭނެ.
އަޅުގަނޑުމެން މިތިބީ ރައްޔިތުންގެ ޚިދުމަތުގައި. pic.twitter.com/0giiBuLd1n

— Maldives Immigration (@ImmigrationMV) November 23, 2021

އިމިގްރޭޝަނުން މީގެ ކުރިން ވަނީ ވިސާއާ ގުޅޭ ހުރިހާ ހިދުމަތެއްވެސް އޮންލައިން ކޮށްފައެވެ. އަދި ބިދޭސީ މަސައްކަތްތެރިން ރާއްޖެ އައުމަށްފަހު އެންމެ ފުރަތަމަ ދައްކަންޖެހޭ ވިސާ ފީ އޮންލައިންކޮށް ދެއްކޭނެ އިންތިޒާމުވެސް ވަނީ ހަމަޖައްސައިފައެވެ. މީގެ ކުރިން މި ފީ ދައްކަންޖެހެނީ މީރާއަށެވެ.