ޓްރާންސްޕޯޓް އޮތޯރިޓީ އުވާލުމަށް، އެއޮތޯރިޓީގެ މައްސަލަ ބަލަމުން ދިޔަ ރައްޔިތުންގެ މަޖިލީހުގެ ކޮމިޓީން ފާސްކޮށްފިއެވެ.

މި މައްސަލަ ބަލަމުން ދިޔައީ ގައުމީ ތަރައްގީއާއި ތަރިކައިގެ ކޮމިޓީއާއި ލާމަރުކަޒީ ކޮމިޓީ އެކުލަވާލައިގެން އުފައްދާފައިވާ ޖޮއިންޓް ކޮމިޓީއަކުންނެވެ. އެގޮތުން ޓްރާންސްޕޯޓް އޮތޯރިޓީ އުވާލުމަށް މިއަދު މި ޖޮއިންޓް ކޮމިޓީއިން ވަނީ ފާސްކޮށްފައެވެ.

ޓްރާންސްޕޯޓް މިނިސްޓްރީގެ ހިންގުން ހަރުދަނާކުރުމަށް ޓްރާންސްޕޯޓް އޮތޯރިޓީގެ ގާނޫނު އުވާލުމަށް ރައްޔިތުންގެ މަޖިލީހަށް ބިލު ހުށައެޅީ ސަރުކާރުގެ ފަރާތުން ވައިކަރަދޫ ދާއިރާގެ މެމްބަރ ހުސައިން ޒިޔާދެވެ.

މި ބިލް ހުށަހަޅުއްވަމުން މެމްބަރ ހުސައިން ޒިޔާދު ވިދާޅުވީ މި ބިލް ހުށަހަޅުއްވަނީ މޯލްޑިވްސް ޓްރާންސްޕޯޓް އޮތޯރިޓީގެ ގާނޫނުގެ ދަށުން އުފައްދާފައިވާ މޯލްޑިވްސް ޓްރާންސްޕޯޓް އޮތޯރިޓީ އުވާލައި އެ އޮތޯރިޓީން ކުރަމުންދިޔަ މަސައްކަތްތައް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށް ބަދަލުކުރުމަށް ސަރުކާރުން ނިންމާފައިވާތީ ކަމަށެވެ.

ޓްރާންސްޕޯޓް އޮތޯރިޓީގެ ގާނޫނު އުވާލުމާއި ގުޅޭގޮތުން ކޮމިޓީގެ މެމްބަރުން މީގެ ކުރިން ވަނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، މޯލްޑިވްސް ޓްރާންސްޕޯޓް އޮތޯރިޓީ އާއި، އެޓަރނީ ޖެނެރަލް އަދި ލޯކަލް ގަވަރމެންޓް އޮތޯރިޓީއާ ބައްދަލުކޮށް މަޝްވަރާ ކޮށްފައެވެ.

އެގޮތުން މި ބައްދަލުވުންތަކުގައި ޓްރާންސްޕޯޓް މިނިސްޓްރީގެ ބޭފުޅުން ވިދާޅުވެފައި ވަނީ ޓްރާންސްޕޯޓް އޮތޯރިޓީގެ ގާނޫނު އުވާލަނީ އެ އޮތޯރިޓީއާއި މިނިސްޓްރީން ކުރަމުންދާ މަސައްކަތްތަކުގައި ފުށުއެރުންތަކެއް ހުރުމުގެ ސަބަބުން ކަމަށެވެ. އަދި މި ފުށުއެރުންތަކާއެކު އެ އޮތޯރިޓީގެ ބޯޑުން މިނިސްޓަރ ބޭނުންފުޅުވާ ގޮތަށް ސިޔާސަތުތައް ތަންފީޒް ކުރަމުން ނުގެންދާކަމަށްވެސް ވަނީ ފާހަގަކޮށްފައެވެ.

މީގެއިތުރުން، އިންޓަރނޭޝަނަލް ބެސްޓް ޕްރެކްޓިސްއަށް ބަލާލާއިރު، ދަތުރުފަތުރާ ގުޅުންހުރި ކަންކަން އަބަދުވެސް ބަލަމުންދާނީ މިނިވަން ސިޔާސީ ނުފޫޒުން އެއްކިބާވެފައިވާ ތަނަކުން ކަމަށާއި ނަމަވެސް ރާއްޖޭގެ ހާލަތަށް ބަލާނަމަ ޓްރާންސްޕޯޓް އޮތޯރިޓީގެ ތެރޭގައި ވަރަށް ބޮޑަށް ކޮރަޕްޝަންގެ އަމަލުތައް ދަނީ ހިނގަމުން ކަމަށް ޓްރާންސްޕޯޓް މިނިސްޓްރީގެ ވެރިން ވަނީ ފާހަގަކުރަށްވާފައެވެ. މިކަމުން އެއްކިބާވެ، އަރައިގަތުމަށް އޮތް އެންމެ ހައްލަކީ އެތަން އުވާލައި އެތަނުން ކުރަމުންދިޔަ މަސައްކަތްތައް މިނިސްޓްރީގެ ދަށަށް ގެނައުން ކަމަށް މިނިސްޓްރީގެ ބޭފުޅުން ވަނީ ވިދާޅުވެފައެވެ.

ޓްރާންސްޕޯޓް އޮތޯރިޓީއަކީ ކުރީގެ ރައީސް އަބްދުﷲ ޔާމީން ޓްރާންސްޕޯޓް މިނިސްޓްރީ އުވާލުމަށްފަހު އުފެއްދެވި ތަނެކެވެ. މިސަރުކާރު އައުމަށްފަހު ވަނީ ޓްރާންސްޕޯޓް މިނިސްޓްރީ އަލުން އުފައްދަވާފައެވެ.