ޗައިނާ ސަރުކާރުގެ ދައުވަތަކަށް އދ. ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު އެގައުމަށް ފުރާވަޑައިގެންފިއެވެ.

ފޮރިން މިނިސްޓަރ ޝާހިދު ވިދާޅުވީ, އެމަނިކުފާނު އަންގާރަ ދުވަހު ޗައިނާއަށް ފެށްޓެވި މި ދަތުރުފުޅަކީ، 3 ދުވަހުގެ ދަތުރުފުޅެއްކަމަށެވެ.

Departing to China today on a 3-day official visit, on invitation from the Government.

I look forward to discussing areas of mutual concern, including recovery from the pandemic, sustainable development, the ongoing climate crisis and revitalization of the United Nations.

— Abdulla Shahid (@abdulla_shahid) November 23, 2021

ޗައިނާ ސަރުކާރުގެ ދައުވަތަކަށް މިނިސްޓަރ ޝާހިދު ކުރައްވާ މި ދަތުރުފުޅުގައި، ދެގައުމުން އިސްކަންދޭ ކަންތައްތަކާއި، ކޮވިޑުގެ ބަލިމަޑުކަމުން އަރައިގަތުމަށް ކުރާ މަސައްކަތްތަކާއި، ދެމެހެއްޓެނިވި ތަރައްގީގެ އިތުރުން، މޫސުމީ ބަދަލުތަކާއި ކާރިސާތަކާއި އދ. އަށް ގެންނަ އައު ބަދަލުތަކާ ގުޅޭގޮތުން މަޝްވަރާ ކުރެއްވުމަށް ވަނީ ހަމަޖެހިފައެވެ.

ޗައިނާ ސަރުކާރުގެ އޮފިޝަލް، ޒަންގ ޖުން، ޝާހިދުގެ މި ދަތުރުފުޅާ ގުޅޭގޮތުން ވިދާޅުވީ މި ދަތުރުފުޅުގެ ސަބަބުން ޗައިނާއާއި އދ. ގެ ގުޅުން އިތުރަށް ބަދަހިވެގެންދާނެކަމަށް ޤަބޫލުފުޅުކުރައްވާކަމަށެވެ.

ފޮރިން މިނިސްޓަރ ޝާހިދުގެ މި ދަތުރުފުޅުގައި ޗައިނާ ސަރުކާރުގެ އިސްވެރިންނާއި ބައްދަލުކުރެއްވުމަށް ވަނީ ހަމަޖެހިފައެވެ.