އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށައަޅާފައިވާ ދަޢުލަތުުގެ ބަޖެޓްގެ ބަހުސް މިއަދު ނިންމައި ވޯޓަށް އައްސަވާނެ ކަމަށް ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސް ނަޝީދު ވިދާޅުވީ އަމާޒަކީ މިއަދު ބަޖެޓުގެ ބަހުސް ނިންމައި، މަޖިލީހުގެ ޖަލްސާ ނިމުމުގެ ކުރިން ބަޖެޓަށް ވޯޓަށް އެއްސެވުން ކަމަށެވެ. ބަޖެޓް ކޮމިޓީން މަޖިލީހުގެ ތަޅުމަށް ހުށައެޅި ރިޕޯޓުގެ ބަހުސްގައި 17 މެމްބަރަކު ބައިވެރިވެވަޑައިގަންނަވަން އެދިވަޑައިގަންނަވާފައިވާ ކަމަށް ރައީސް ނަޝީދު ވިދާޅުވިއެވެ.

ބަޖެޓް ކޮމިޓީން ފާސްކޮށް މަޖިލީހަށް ހުށައެޅި ރިޕޯޓްގައި ވަނީ 2022 ވަނަ އަހަރަށް ލަފާކޮށް ފިނޭންސުން ރައްޔިތުންގެ މަޖިލީހަށް ހުށައަޅާފައިވާ 36.925 ބިލިއަން ރުފިޔާގެ ބަޖެޓަށް ކޮމިޓީން ގެނައި އިސްލާހުތަކުގެ ސަބަބުން އިތުރުވި 73.856 މިލިއަން ރުފިޔާއާއެކު 2022 ވަނަ އަހަރަށް ލަފާކުރާ ދައުލަތުގެ ޖުމްލަ ބަޖެޓުގެ އަދަދަކީ 36.999 ބިލިއަން ރުފިޔާ ކަމަށެވެ.

ބަޖެޓް ބަހުސްގައި މެންބަރުންގެ އެންމެ ބޮޑު ކަންބޮޑުވުންތަކުގެ ގޮތުގައި ފާހަގަ ކުރައްވާފައި ވަނީ ދަރަނި ބޮޑު ވުމާއި، ބަޖެޓްގައި ހުށަހަޅާފައިވާ ޕީއެސްއައިޕީ ޕްރޮޖެކްޓްތައް ބަޖެޓްގައި ހިމަނާފައިވާ ގޮތަށް ތަންފީޒު ނުކުރެވިދާނެ މައްސަލައާ މެދުގައެވެ.

މިކަންބޮޑުވުން ތަކަށް އަލިއަޅުއްވާލައްވަމުން މަޖިލީހުގެ ރައީސް މުޙައްމަދު ނަޝީދު ވިދާޅުވީ ބަޖެޓުގެ ދަރަނި ބޮޑުވުމުގެ ކަންބޮޑުވުމަށް އޮތް ހައްލަކީ ދަރަނި ރީސްޓްރަކްޗަރ ކޮށްގެން ދަރަނި ދެއްކުން ފަސްކުރުން ނުވަތަ ދަރަނި ދައްކަން ޖެހޭ މިންވަރު ކުޑަކުރުން ކަމަށެވެ.