ކުރީގެ ރައީސް އަބުދުﷲ ޔާމިން ފަސް އަހަރަށް ޖަލަށްލުމަށް ކުރި ހުކުމުގެ އިސްތިއުނާފު މައްސަލައިގައި ސްޕްރީމް ކޯޓުން އިއްވާނެ ހުކުމާއި ބެހޭގޮތުން ވާހަކަ ނުދެއްކުމަށް އެމަނިކުފާނުގެ ވަކީލުންގެ ޓީމުގެ އިސްވަކީލު ޑރ.މުހަންމަދު ޖަމީލް ގޮވާލައްވައިފިއެވެ.

މަނީލޯންޑަރިންގެ ކުށުގައި ކުރީގެ ރައީސް އަބުދުﷲ ޔާމިން ފަސް އަހަރަށް ޖަލަށް ލުމަށް ކުރި ޙުކުމުގެ އިސްތިއުނާފު މައްސަލައިގައި އަންނަ އަންގާރަ ދުވަހު ހުކުމް ކުރަން ސްޕްރީމް ކޯޓުގައި ވަނީ ތާވަލްކޮށްފައެވެ. އެކަމާ ގުޅިގެން ރައީސް ޔާމިނަށް އިއްވާނެ ހުކުމަކާއި ބެހޭގޮތުން އެކި ފަރާތްތަކުން ޚިޔާލު ފާޅުކުރަމުންދާތީ ރައީސް ޔާމިންގެ ވަކީލުންގެ ޓީމުގައި ހިމެނިވަޑައިގަންނަވާ އިސް ވަކީލު އަދި ކުރީގެ ނާއިބް ރައީސް ޑރ.މުހަންމަދު ޖަމީލް ވިދާޅުވީ، ރައީސް ޔާމިންގެ ހުކުމް އަންނާނެ ގޮތަކާއި ބެހޭގޮތުން ވާހަކަ ދެއްކުމަކީ ޒިންމާދާރު ގޮތެއް ނޫން ކަމަށެވެ.

ސުޕްރީމް ކޯޓުގައި ރައީސް ޔާމީންގެ ފަރާތުން މައްސަލަ އިސްތިއުނާފު ކުރީ ކްރިމިނަލް ކޯޓާއި ހައިކޯޓުން ވެސް މައްސަލަ ނިންމެވުމުގައި ބޮޑެތި ގޯސްތަކެއް ހަދާފައިވާ ކަމަށް ގަބޫލު ކުރެވޭތީ ކަމަށާއި އެވާހަކަ ވަރަށް ދިގުކޮށް ދެއްކިފައިވާ ކަމަށް ޑރ. ޖަމީލް ވިދާޅުވިއެވެ. ޑރ.ޖަމީލް ވިދާޅުވީ، ރައީސް ޔާމިނަށް ސްޕްރީމް ކޯޓުން އިއްވާނެ ހުކުމަކާއި ބެހޭގޮތުން ވާހަކަ ދެއްކުމަކީ އެކޯޓުގެ ހުރުމަތް ކަނޑާލުމުގެ އަމަލަކަށް ވެގެން ހިނގައިދާނެ ކަމަށެވެ.

"އަޅުގަނޑުމެންނަށް އޮތީ މަސައްކަތް ކުރުން. އެމަސައްކަތްކޮށް ނިމިއްޖެ. ދެން އޮތީ އަޅުގަނޑުމެން މިކަމަށްޓަކައި ދުއާ ކުރުން. ރައީސް ޔާމީނަށް ހެޔޮ އެދިވަޑައިގަންނަވާ އެތައް ހާސް ރައްޔިތުންނެއް އެ ދުއާ އެބަކުރައްވާ. އެއްވެސް ފަރާތަކަށް ނޭނގޭނެ ހުކުމް އޮންނާނެ ގޮތެއް" ޑރ.ޖަމީލް ވިދާޅުވިއެެވެ.

ރައީސް ޔާމީން ފަސް އަހަރަށް ޖަލަށް ލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށް ކޮށްފައިވާ ހުކުމާއި މެދު ސުޕްރީމް ކޯޓުން ހުކުމް ކުރަން ތާވަލްކޮށްފައިވަނީ އަންނަ އަންގާރަ ދުވަހު ހެނދުނު 09:00 އަށެވެ. ސްޕްރީމް ކޯޓުން މިހާރު ވަނީ ރައީސް ޔާމިން އާއި އެމަނިކުފާނުގެ ވަކީލުންނަށް އެކަން އަންގާފައެވެ.