ރައީސް ނަޝީދުގެ ސަރުކާރުގައި ހިންގި "ވެށިފަހި މާލެ" ޕްރޮގްރާމްގެ ދަށުން ބޯހިޔާވަހިކަމުގެ ލިޔުން ދިން މީހުންނަށް ފްލެޓް ގަތުމަށް ލުއިގޮތްތަކެއް ހަމަޖެއްސުމަށް ރައީސް ޞާލިޙްގެ ސަރުކާރުން މަސައްކަތް ފަށައިފިއެވެ.

"ވެށިފަހީ"ގެ ނަމުގައި ބޯހިޔާވަހިކަމުގެ މަޝްރޫއެއް ފަށާފައިވަނީ ރައީސް ނަޝީދުގެ ވެރިކަމުގައި 2010 ވަނަ އަހަރުއެވެ. މި މަޝްރޫއުގެ ދަށުން މާލެއިން ބިން ދޫކޮށްލާ ފަރާތްތަކަށް އެ ބިމުގެ ބަދަލުގައި ހުޅުމާލެއިން ބިން ދޫކުރުމަށްވަނީ ނިންމާފައެވެ. ބިން ދޫކޮށްލި މީހުންގެ ތެރެއިން ބައެއް މީހުންނަށްވަނީ ފްލެޓާއި ބިން ލިބިފައެވެ.

"ވެށިފަހި މާލެ" ޕްރޮގްރާމްގެ ދަށުން ލިޔުން ލިބުނު ފަރާތްތަކަށް ހައުސިން މިނިސްޓްރީން ފޮނުވާފައިވާ ސިޓީގައި ބުނެފައިވަނީ "ވެށިފަހި މާލެ ޕްރޮގްރާމް" ގެ ދަށުން ގާކޮށްޓާއި ވޭ ސައިޓުން 2017 ވަނަ އަހަރު ވިއްކި ފްލެޓް ގަތުމަށް މާލީ ގޮތުން ލުއި ގޮތެއް އޭރުގެ ސަރުކާރުން ހަމަޖައްސައިދީފައި ނެތް ކަމަށެވެ.

"ކޮމާޝަލް ރޭޓުގައި ފްލެޓް ގަތުމަށް ލޯނު ނަގަން ޖެހުނު ފަރާތްތަކަށް މި ސަރުކާރުން ހިންގާ އަގުހެޔޮ ބޯހިޔާވަހިކަމުގެ މަޝްރޫޢުތަކުގެ ތެރެއިން އެންމެ އަވަހަށް ނިމޭ މަޝްރޫޢަކުން ފްލެޓް ގަތުމުގެ ފުރުސަތު ދިނުމަށް ރައީސުލްޖުމްހޫރިއްޔާ ހަމަޖައްސަވައިފި ކަމުގައި ދަންނަވަމެވެ." ހައުސިން މިނިސްޓްރީގެ ސިޓީގައިވެއެވެ.

މާލެއިން ދޫކޮށްލާ ބިމުގެ ބަދަލުގައި ހުޅުމާލެއިން ގޯތި ލިބޭނެކަމަށް ސަރުކާރުން ލިޔުން ދޫކޮށްފައިވާ ފަރާތްތަކުގެ ތެރެއިން ބޯހިޔާވަހިކަން ހަމަނުޖެހޭ ފަރާތްތަކުން އެކަމާއި ގުޅޭ ލިޔެކިޔުންތައް ހުށަހެޅުމަށް ހައުސިން މިނިސްޓްރީން މިދިޔަ އަހަރުގެ ފެބްރުއަރީ މަހު ހުޅުވާލިއެވެ.

މީގެ ކުރިން ހައުސިން މިނިސްޓަރ އަސްލަމް ވިދާޅުވީ، ވެށިފަހި މާލެ ޕްރޮގްރާމަށް 507 ފަރާތެއް މާލެއިން ބިން ދޫކޮށްލާ ގޮތަށް ޕްރޮގްރާމްގައި ބައިވެރިވެފައިވާ ކަަމަށާއި 245 ފަރާތަކަށް މާލެއިން ބިން ދޫކޮށްލާ ގޮތަށް ހުޅުމާލެއިން ބިން ލިބިފައިވާ ކަމަށާއި، 101 ފަރާތެއް އަރަބިއްޔާ އަދި ގާކޮށި ފްލެޓަށް ވަދެފައިވާ ކަމަށާއި 98 ފަރާތަކަށް ހުޅުމާލެއިން ފްލެޓްތަކަށް ވަދެވުނު ކަމަށެވެ.

ރައީސް ނަޝީދުގެ ސަރުކާރުގައި ހިންގި ވެށިފަހި މާލެ ޕްރޮގްރާމްގެ ދަށުން އިންޑިއާގެ ޓާޓާ ކުންފުންޏާ ހަވާލުކޮށްގެން ފްލެޓް ތަރައްގީކޮށްފައިވަނީ ކުރިން އަރަބިއްޔާ ހުރި ބިމުގައާއި ގާކޮށި ބިމުގައެވެ. މި އިމާރާތްތަކުގެ ފެންވަރު ދަށްކަމަށް ބުނެ އެތަންތަން ލިބުނު ފަރާތްތަކުން ދަނީ ވަރަށް ބޮޑަށް ޝަކުވާ ކުރަމުންނެވެ.

ރައީސް ނަޝީދުގެ ވެރިކަމުގައި އިންޑިއާގެ ޓާޓާ ކުންފުންޏަށް މާލޭގައި ދެ ފްލެޓް ޢިމާރާތް އަޅަން ދިނީ މާލޭގެ ބޮޑު ދެބިމާއި ފަޅުރަށެއް ލާޖެއްސުމަށްފަހުއެވެ. އެއީ އޯޑިއޯން ހުރި ބިމާއި ނާދީ ހުރި ބިމެވެ. މިބިންތަކާއެކު ދެ ފްލެޓް އިމާރާތުގެ ގްރައުންޑާއި ފުރަތަމަ ބުރިވެސް ލިބެނީ ޓާޓާއަށެވެ. ޓާޓާއާއެކު ވެފައިވާ އެއްބަސްވުމަށް ރައީސް ނަޝީދުގެ ސަރުކާރާއި ޑރ. ވަހީދުގެ ވެރިކަމުގައި ވެސް ބަދަލު ތަކެއް ގެނަސްފައި ވެއެވެ. އަދި ދެ ފްލެޓް އިމާރާތުގެ ބަދަލުގައި ފަޅުރަށް ނުދޭ ގޮތަށް ނިންމައި މާލެއިން ޓާޓާއަށް ދިން ބިންތަކަށް ވެސް ބަދަލުތަކެއް ގެނައެވެ. މައުލޫމާތު ލިބިފައިވާ ގޮތުގައި މިހާރު އެއެއްބަސްވުމުގެ ދަށުން ޓާޓާ ކުންފުންޏަށް މާލޭގެ ބަދަލުގައި ބިން ދީފައިވަނީ ހުޅުމާލެއިންނެވެ.