ސްރީލަންކާގައި ބޭއްވި ރާޖަޕަކްސަ ފުޓްބޯޅަ މުބާރާތުގައި މުޅި ރާއްޖެ ލަދުގަންނަވާލި ޔޫތު މިނިސްޓްރީީގެ ސްޓޭޓް މިނިސްޓަރ އަސްޢަދު ޢަލީ (އަޑުބަރޭ) އެންމެ ހަ މެޗަށް ސަސްޕެންޑް ކުރުމަށް އެފްއޭއެމް އިން ނިންމައިފިއެވެ.

ރާޖަޕަކްސަ ފުޓްބޯޅަ މުބާރާތުގައި ސީޝެލްސްއާ ދެކޮޅަށް ރާއްޖެ ކުޅުނު މެޗުގައި ސީޝެލްސްގެ ކެޕްޓަން ސްޓީވްގެ މޫނުމަތީގައި ގަސްތުގައި ޖެހުމުގެ ސަބަބުން އަޑުބަރޭއަށް ވަނީ ރަތްކާޑެއް ދައްކާފައެވެ. އަޑުބަރޭއަށް ރަތްކާޑު ދައްކާފައިވަނީ ކުޅެން ނިކުތްތާ 30 ސިކުންތުގެ ތެރޭގައެވެ.

މުޅި ރާއްޖެ ލަދުގަންނަވާލި މި ޢަމަލާ ގުޅިގެން އެފްއޭއެމްގެ ޑިސިޕްލިނަރީ ކޮމިޓީން އަސްހަދު އަލީ (އަޑުބަރޭ) ހަ މެޗަށް ސަސްޕެންޑްކޮށް 12،000 ރުފިޔާ އިން ޖޫރިމަނާކޮށްފައިވާއިރު ދިފާއުގައި އޭނާ ބުނެފައިވަނީ އެގޮތަށް ކަންތަށް ކުރެވުނީ ފްރަސްޓްރޭޓް ވެގެން ކަމަށެވެ.

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޑިސިޕްލިނަރީ ކޮމިޓީގެ ޗެއާމަން ވިދާޅުވީ މިގޮތަށް ނިންމައި އެކަން ތަންފީޒުކުރަން އެފްއޭއެމަށް މިހާރު އަންގާފައިވާ ކަމަށެވެ.