ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމް ރާއްޖެ ދޫކޮށް ފިލައިގެންދާން އުޅޭ ކަމުގެ ހެކި އެބަހުރި ކަމަށް ދަޢުލަތުން ކްރިމިނަލް ކޯޓުގައި ބުނެފިއެވެ.

ރ. ފުއްގިރި ކުއްޔަށް ދޫކުރުމުގައި ރިޝްވަތު ގަބޫލު ކުރުމާއި މަނީ ލޯންޑްރިން ހިންގާފައިވާ ކަމަށް ތުހުމަތުކޮށް ދަޢުލަތުން ރައީސް ޔާމީނާ ދެކޮޅަށް ކްރިމިނަލް ކޯޓުގައި އުފުލާފައިވާ ދަޢުވާގެ މިއަދުގެ އަޑުއެހުމުގައި ދަޢުލަތުން ބުނީ ޝަރީޢަތް ނިމެންދެން ރައީސް ޔާމީނުގެ ޕާސްޕޯޓު ހިފަހައްޓަން އެދޭ ކަމަށެވެ. އަދި އެގޮތަށް އެދުނީ ރައީސް ޔާމީން ކުށެއް ކޮށްފައިވާ ކަމަށް އެކަށީގެންވާ ހެކި ލިބިފައިވުމާއި ރާއްޖެއިން ފިލައިގެން ދާން އުޅޭ ކަމުގެ ހެކި ލިބިފައިވުމުން ކަމަށެވެ.

ހަމައެއާއެކު ރައީސް ޔާމީނަކީ ރާއްޖޭން ބޭރުގައި ފިލައިގެން އުޅުމުގެ މާލީ ތަނަވަސްކަން ހުރި މީހެއްކަން ޔަގީންކުރުމަށް ބޭންކު އެކައުންޓުތަކުގެ ސްޓޭޓްމަންޓުތައްވެސް ހުށަހަޅާފައި ވާނެ ކަމަށާއި އަދި ޔާމީނަކީ ކުރިން ރައީސްކަން ކުރައްވާފައިވާ ބޭފުޅަކަށްވާތީ، އެ ގުޅުންތައްވެސް ހުންނާނެ ކަމަށް ދައުލަތުން ފާހަގަކޮށްފައިވެއެވެ. އަދި ކުރީގެ ނައިބުރައީސް އަދީބުވެސް ފިއްލެވިކަމަށާއި އަދި ކުރީގެ ފަތުރުވެރިކަމާބެހޭ ވަޒީރު ޢަލީ ވަޙީދުވެސް ފިލާފައިވާކަން ދަޢުލަތުން ވަނީ ފާހަގަކޮށްފައެވެ.

މިއަދުގެ ޝަރީޢަތުގެ މަޖިލީހުގައި ދަޢުލަތަށް ރައްދު ދެއްވަމުން ޔާމީން ވިދާޅުވީ ދަޢުލަތުން ކޮށްފައިވަނީ ކޮށްގެން ނުވާނެ ތުހުމަތެއް ކަމަށާއި ރާއްޖެ ދޫކޮށް ފިލަން އެމަނިކުފާނު ނޫޅުއްވާ ކަމަށެވެ. އަދި ދައުލަތުގެ އަތުގައި ހުރި ހެކިތަކަކީ ކޮބައިތޯ ބަލައި އެކަން ދިރާސާކުރަން ވަގުތު ބޭނުންވާކަމަށް ރައީސް ޔާމީން ވިދާޅުވިއެވެ.

ރ. ފުއްގިރި ކުއްޔަށްދޫކުރި މައްސަލާގައި ހަތް ދުވަހަށް ރައީސް ޔާމީން ރާއްޖެއިން ބޭރަށް ފުރުން މަނާކޮށް ކޯޓުން ނެރެފައިވާ އަމުރެއް މިހާރުވެސް އެބަ އޮތެވެ. ފުއްގިރި މައްސަލާގައި ކޯޓުން އެ އަމުރު ނެރުނީ ގއ. ވޮޑުމުލާ މައްސަލާގައި ރައީސް ޔާމީންގެ މައްޗަށް ދަށު ކޯޓުން ސާބިތުވެފައި އޮތް މަނީލޯންޑްރިންގެ ކުށުގެ ދައުވާއަކީ އެމަނިކުފާނުގެ މައްޗަށް ސާބިތުވާ ހުކުމެއް ނޫންކަން ކަނޑައަޅައި ފަސް އަހަރުގެ ޖަލު ހުކުމް ސުޕްރީމް ކޯޓުން ބާތިލްކުރުމާއެކު ޔާމީން މިނިވަންވުމުންނެވެ.

ކްރިމިނަލް ކޯޓުން މިއަދު ނިންމަވާފައިވަނީ ރައީސް ޔާމީންގެ ޕާސްޕޯޓް ހިފެހެއްޓުމާމެދު ގޮތެއް ނިންމައި ދެފަރާތުން ވާހަކަދެއްކުމަށް މިއަދު ހަވީރަށް އިތުރު އަޑުއެހުމެއް ތާވަލުކުރުމަށެވެ. މި މައްސަލަ ބައްލަވަނީ ކްރިމިނަލް ކޯޓުގެ އިސްގާޒީ އަހުމަދު ޝަކީލެވެ.