ހުޅުމާލޭ ރަޖިސްޓްރީގެ މައްސަލައިގައި މާލޭ ސިޓީ ކައުންސިލްގެ ނިންމުން މަޑުޖައްސާލަން އެންގުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން ފާސްކޮށްފިއެވެ.

އެޗްޑީސީއަށް ރަޖިސްޓްރީ ކޮށްދީފައިވާ ހުޅުމާލޭގެ ބިމުގެ ރަޖިސްޓްރީ ބާތިލްކުރުމަށް މާލޭ ސިޓީ ކައުންސިލުން ނިންމީ މި ޑިސެންބަރު މަހުގެ 8 ވަނަ ދުވަހު ބޭއްވި އެކައުންސިލްގެ ހަތަރު ވަނަ ދައުރުގެ 30 ވަނަ އާންމު ޖަލްސާގައެވެ. އެގޮތަށް ފާސްވީ ސިޓީ ކައުންސިލްގެ 12 މެމްބަރުންގެ އަޣުލަބިއްޔަތުންނެެވެ.

އެކަމާ ގުޅިގެން މާލޭ ސިޓީ ކައުންސިލާއި ހުޅުމާލޭގެ ރަޖިސްޓްރީ އޮތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ދެމެދު ބަހުގެ ޙަމަލާތަކެއް ބަދަލުކޮށްފައިވާއިރު އެ މައްސަލަ އެޗްޑީސީން ވަނީ ކޯޓަށް ހުށައަޅާފައެވެ.

އެ މައްސަލާގައި އެލްޖީއޭއިން ބޭއްވި ކުއްލި ޖަލްސާގައި ނިންމާފައި ވަނީ ސިޓީ ކައުންސިލުން ފާސްކުރި ގޮތަށް އަމަލުކުރުން ހުއްޓުވުމުގެ އިތުރުން، އެކަން ހިނގައިދިޔަ ގޮތް ބެލުމަށްޓަކައި އިންކުއަރީއެއް ކުރިއަށް ގެންދިއުމަށެވެ.

މާލެ ސިޓީ ކައުންސިލުން ހުޅުމާލޭގެ ބިމުގެ ރަޖިސްޓަރީ ބާޠިލްކުރަން ނިންމި މައްސަލާގައި އެޗްޑީސީން ބުނީ ހުޅުމާލޭގެ ބިމުގެ ރަޖިސްޓްރީ މާލެ ސިޓީ ކައުންސިލުން ބާޠިލްކޮށްފައިވާކަން ސިޓީއަކުން އަންގާފައިވާކަމަށެވެ. ނަމަވެސް އެ ނިންމުމަކީ ޤާނޫނުއަސާސީން ކަށަވަރުކޮށްދީފައިވާ މުދާ ހޯދުމާއި މުދާ ގެންގުޅުމުގެ ޙައްޤާއި، ބިމާބެހޭ ޤާނޫނުގެ 24ވަނަ މާއްދާގެ (ށ)އާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގެ 56ވަނަ މާއްދާގެ (ށ)އާ ޚިލާފަށް ނިންމަވާފައިވާ ނިއްމެވުމެއްކަމަށް އެޗްޑީސީން ބުނެފައި ވެއެވެ.