އިސްލާމް ފޮތުގެ ކަަރިކިއުލަމް ނިންމަނީ އެޑިއުކޭޝަން މިނިސްޓަރ އެކަނި ކަމަށް ދެއްކުމަކީ ފިތުނައެއް ކަމަށް ރައީސް އޮފީހުގެ މިނިސްޓަރު މުހަންމަދު ޝިފާޒް ވިދާޅުވެއްޖެއެވެ.

ޝިފާޒް މިމޭރުމުން ވިދާޅުވެފައިވަނީ ސްކޫލްތަކުގައި ކިޔަވައިދޭ އިސްލާމާއި ގުރުއާން ފޮތް ޗާޕުކުރާއިރު އެ ފޮތްތަކުގައި މިހާރު ހުރި ގުރުއާންގެ އާޔަތްތައް އުނިކުރަން ތަޢުލީމާބެހޭ ވުޒާރާއިން އެންއައިއީއަށް ސިޓީއެއް ފޮނުވާފައިވާނެ ކަމަށާއި ނަމަވެސް ފަހުން އެނިންމުން ބަދަލުކުރި ކަމަށް ތަޢުލީމާބެހޭ ވުޒާރާއިން ހާމަކުރުމާ ގުޅިގެން އެކަމާމެދު ސަރުކާރުގައި ތިއްބެވި ބައެއް ޕާޓީތަކުން ދައްކަވަމުން ގެންދަވާ ވާހަކަތަކަށް ރައްދު ދެއްވަމުންނެވެ.

އެގޮތުން ސަރުކާރުގައި ހިމެނޭ ޢަދާލަތު ޕާޓީގެ އިސް ބޭފުޅުން ވަނީ ސަރުކާރުގެ ޢަމަލުތައް ގޯސްކޮށް ދާނަމަ ފިޔަވަޅު އެޅުމުގެ "ގަޓް" ހުރިކަމަށް ބުނެ ސަރުކާރަށް އިންޒާރުދީފައެވެ.

އެކަމަށް ރައްދު ދެއްވަމުން ޝިއްޕެ ވިދާޅުވީ އިސްލާމް ފޮތުގެ ކަަރިކިއުލަމް ނިންމަނީ އެޑިއުކޭޝަން މިނިސްޓަރ އެކަނި ކަމަށް ދެއްކުމަކީ ފިތުނައެއް ކަމަށެވެ.

"މީ ކަނޑައެޅިގެން ފިތުނައެއް. ކަރިކިއުލަމް ނިންމަނީ މިނިސްޓަރ އެކަނިކަމަށް ދެކޭނަމަ ތީ ބޮޑު އޮޅުމެއް." ޝިއްޕެ ވިދާޅުވެފައިވެއެވެ.

ސްކޫލްތަކުގައި ކިޔަވައިދޭ ގުރުއާން އަދި އިސްލާމް ފޮތްތަކުގައި ހުރި ގުރުއާނުގެ ބައެއް އާޔަތްތަކުގައި ކުށް ހުރި މައްސަލައެއް ފެންމަތިވީ މިދިޔަ ސެޕްޓެމްބަރު މަހުގެ ކުރީކޮޅުއެވެ.

އެކަމާގުޅިގެން ރާއްޖޭގެ ސްކޫލްތަކުގެ އިސްލާމް ފޮތްތަކުން ކީރިތި ޤުރުއާންގެ އާޔަތްތައް އުނިކޮށް އާޔަތްތަކުގެ ނަންބަރާއެކު މާނަ ލިޔުމަށް ތަޢުލީމީ ވުޒާރާއިން ނޭޝަނަލް އިންސްޓިޓިއުޓް އޮފް އެޑިއުކޭޝަނަށް ފޮނުވިކަމަށް ބުނާ ސިޓީއެއް ވަނީ ޢާއްމު ވެފައެވެ.