ރާއްޖޭގެ މާކެޓް ޢަރަބި ދުނިޔޭގައި ޕްރޮމޯޓް ކޮށްދިނުމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ހަސަން ޝިޔާން (ގިޓާ) ޖަމިއްޔަތުއް ޞަލަފަށް ގޮވާލައްވައިފިއެވެ.

މެންބަރު ގިޓާ މިމޭރުމުން ވިދާޅުވީ، ރާއްޖޭގައި ހޯމް ސްޓޭ ފަތުރުވެރިކަން ތައާރަފް ކުރުމުން އެކަމަކީ ދަރިންގެ އިއްފަތާއި، އަބުރު ގެއްލި، އާއިލާތައް ރޫޅުމުގެ އިތުރުން މި ގައުމުގެ އިސްލާމީ ސަގާފަތް ގެއްލިގެންދާނެ ކަމެއް ކަމަށް ބުނެ ސަލަފު ޖަމިއްޔާއިންނާއި އަދާލަތު ޕާޓީއަށް ނިސްބަތްވާ ބައެއް ދީނީ އިލްމްވެރިން ދައްކަވާ ވާހަކަތަކަށް ރައްދު ދެއްވަމުންނެވެ.

ދީނީ ޢިލްމުވެރިންގެ ވާހަކަތަކަށް ރައްދު ދެއްވަމުން މެންބަރު ގިޓާ ވިދާޅުވީ ފަތުރުވެރިންނަކީ ހަމައެކަނި ޔޫރަޕުން އަންނަ ބައެއް ނޫންކަމަށެވެ. އަދި ރާއްޖޭގެ މާކެޓް ޢަރަބި ދުނިޔޭގައި ޕްރޮމޯޓް ކުރުމަށް ޞަލަފަށްވެސް މަސައްކަތް ކުރެވިދާނެ ކަމަށް ގިޓާ ވިދާޅުވިއެވެ.

"ޢަރަބިކަރައިންވެސް ބައިވަރު ފަތުރުވެރިން އެބަ އާދޭ. އެމީހުން ގެންނަން ޞަލަފުންވެސް ބޮޑަށް އުޅުނީމަ ޤައުމަށް ލިބޭ އެއްޗެއް ހަމަ ވާނީ އިތުރު." މެންބަރު ޝިޔާން ވިދާޅުވެފައިވެއެވެ.

Homestay aa dhekolhah salafun mi ulhenee keevegenbaa Balaga fathuruverinakee hama ekani Europe in annan bayei nooneinunthoa Arabi karainves fathuruverin baivaru eba aadhey emeehun gennan salafunves bodah ulhuneema gaumah libey aeichei hama vaanee ithuru

— Hassan Shiyan (@HassanShiyaan) January 3, 2022

ހޯމް ސްޓޭ ތައާރަފް ކުރުމާއި ގުޅިގެން ޖަމިއްޔަތުލް ސަލަފުން ނެރުނު ބަޔާނެއްގައި ބުނެފައިވަނީ "ހޯމް ސްޓޭ" ތައާރަފްކުރަން ސަރުކާރުން ނިންމާފައިވާ ނިންމުމަކީ މާދުރުނޫން މުސްތަގުބަލެއްގައި މި އިސްލާމީ ގައުމުގެ ކުރިއަށް އޮތް ޖީލުގެ އަހްލާގިއްޔާތަށް ފޫނުބެއްދޭ ވަރުގެ ގެއްލުން ލިބޭނެ ކަމެއްކަމަށް އެ ޖަމުއިއްޔާއިން ދެކޭ ކަމަށެވެ.

ސަލަފްގެ ބަޔާނުގައި ވަނީ ހޯމް ސްޓޭ ޓޫރިޒަމް ވަގުތުން ހުއްޓާލުމަށްވެސް ސަރުކާރަށް ގޮވާލާފައެވެ.