ސަރުކާރުން ރިސޯޓް ހަދަން ދޫކޮށްފައިވާ 85 ރަށުގެ މަސައްކަތް ދޮޅުއަހަރުތެރޭގައި ނުފަށައިފިނަމަ އެރަށްތައް އަތުލާނެ ކަމަށް ފަތުރުވެރިކަމާބެހޭ ވަޒީރު ޑރ. ޢަބްދުالله މައުސޫމް ވިދާޅުވެއްޖެއެވެ.

2020 ވަނަ އަހަރު ހއ. ހޯރަފުށީ އެއާޕޯޓު ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޞާލިޙް ވިދާޅުވީ ރައީސް ޔާމީންގެ ސަރުކާރުން 85 ރަށް ރިސޯޓު ހެދުމުގެ ނަމުގައި ވިއްކާފައިވާ ކަމަށާއި، ނަމަވެސް އެރަށްތައް ތަރައްގީ ނުކުރާ ކަމަށެވެ. އަދި އެރަށްތަކުން ދަޢުލަތަށް ޢާމްދަނީއެއްވެސް ނުލިބޭ ކަމަށް ރައީސް ވިދާޅުވިއެވެ.

ރައީސްގެ ވާހަކަފުޅަށް ބާރު ދެއްވަމުން ފަތުރުވެރިކަމާބެހޭ ވަޒީރު މައުސޫމް ރޭ ޓީވީ ޕްރޮގްރާމެއްގައި ވިދާޅުވީ ރިސޯޓް ހަދަން ދޫކޮށްފައިވާ 85 ރަށުގެ މަސައްކަތް އަދިވެސް ފަށާފައިނުވާ ކަމަށެވެ. އެހެންކަމުން ސަރުކާރުން މިހާރު ވިސްނަވަމުން ގެންދަވަނީ 3 އަހަރުގެ މުއްދަތެއް އެކި ލުއިތަކާއެކު އެފަރާތްތަކަށް ދިނުމަށް ކަމަށް ވަޒީރު ވިދާޅުވިއެވެ. ނަމަވެސް މިގޮތަށްދޭ 3 އަހަރުގެ ތެރެއިން ފުރަތަމަ ދޮޅު އަހަރުގެ ތެރޭގައި މަސައްކަތް ނުފަށައިފިނަމަ ރަށް އަތުލާނެ ކަމަށް ވަޒީރު ވިދާޅުވިއެވެ.

"މިހާރު ނިންމާފައި މިއޮތީ އެބޭފުޅުންނަށް ތިން އަހަރު ދިނުމަށް އެކިއެކި ލުއިތަކާއެކު ރިސޯޓު ހަދަން. ދޮޅު އަހަރުން އެންމެ އަވަހަށްވެސް ރިސޯޓެއް މި ތަރައްގީ ކުރެވެނީ. އެހެންވީމާ ދޮޅު އަހަރުވާއިރު މަސައްކަތް ނުފަށައިފިނަމަ، އަޅުގަނޑުމެން އެގްރީމަންޓް ބާތިލު ކުރާނަން" މިނިސްޓަރު ވިދާޅުވިއެވެ.

ފަތުރުވެރިކަމަށް ދޫކުރާ ރަށްތައް ނުހެދި ގިނަ ދުވަސްވުމުން އެކަމުގެ ގެއްލުން މުޅި އިގްތިޞާދަށް ކުރާ ކަމަށާއި އެހެންކަމުން އެ ރިސޯޓުތައް އަވަހަށް ހުޅުވޭނެ ގޮތަކަށް ފުރުސަތު ތަނަވަސްކޮށްދިނުމަކީ ސަރުކާރުގެ ވިސްނުން ކަމަށްވެސް ވަޒީރު ވިދާޅުވިއެވެ. ހަމައެއާއެކު ފަތުރުވެރިކަމުގެ ނަފާ އެންމެ ފުރިހަމަ ގޮތުގައި ލިބޭނީ ނުހެދި ހުރި ރަށްތައް އަވަހަށް ނިންމައި މާކެޓަށް ނެރެގެންކަން މިނިސްޓަރ ފާހަގަ ކުރެއްވިއެވެ.

"ރައީސް ޔާމީންގެ ވެރިކަމުގައި އެ ދޫކުރި ރަށްތަށް ނުއަގުގައި ދޫކޮށް، އެދޫކުރި ރަށްތަކުގެ ފައިސާކޮޅުވެސް ހިފައިގެން ވަޑައިގެންނެވީ. ފައިސާކޮޅުވެސް ހިފައިގެން ވަޑައިގެންނެވީ. އެވެސް ބަޖެޓްގައި ހުރިނަމަތާ މި ދަތިޙާލުގައި އޭގެންވެސް އަޅުގަނޑުމެންނަށް ޚަރަދު ކުރެވޭނީ." ހއ. ހޯރަފުށީ އެއަރޕޯޓް ހުޅުވުމަށް ބޭއްވި ރަސްމިއްޔާތުގައި ރައީސް ޞާލިޙް ވިދާޅުވިއެވެ.