ޒިކުރާ މިސްކިތުގެ މައްސަލައިގައި އެސްޖޭ ކުންފުނިން ދައުލަތަށް ދައްކަން ހުކުމް ކޮށްފައިވާ ފައިސާގެ ބަދަލުގައި، ހުޅުމާލޭގައި މިސްކިތެއް އަޅައިދޭން އެއްބަސްވެއްޖެއެވެ.

ކުރީގެ ޒިކުރާ މިސްކިތް ހުރި ބިމުގައި "ދާރުލް ޛިކްރާ" ގެ ނަމުގައި ވަޤުފު އިމާރާތެއް އެޅުމަށް އެސް.ޖޭ ކޮންސްޓްރަކްޝަނާ ރައީސް ޔާމީންގެ ސަރުކާރުން ހަވާލުކޮށްފައިވަނީ 2018 ވަނަ އަހަރުގެ ޖުލައި މަހުގެ 9 ވަނަ ދުވަހުއެވެ. މި މަސައްކަތް އެ ކުންފުންޏާއި ހަވާލުކުރީ 25 މަސްދުވަހުން ނިންމާގޮތަށެވެ. އެހެންނަމަވެސް މަސައްކަތް ހަވާލުކުރިތާ އަހަރަކާއި ގާތްވިއިރުވެސް އެ މަސައްކަތް ފެށިފައެއް ނުވެއެވެ. އެކަމަކު އޭރު އޮތީ ސަރުކާރުން ދޭންޖެހޭ 30 މިލިއަން ރުފިޔާ އެ ކުންފުންޏަށް ދީފައެވެ.

އިސްލާމިކް މިނިސްޓްރީން މިއަދު ބުނީ، އެ މައްސަލައިގެ ޑިސްޕިއުޓް ރިޒޮލިއުޝަން މަރުހަލާގައި އެސްޖޭއިން ދޭންޖެހޭ 30 މިލިއަން ރުފިޔާގެ ބަދަލުގައި ދެފަރާތަށް އެއްބަސްވެވޭ ގޮތެއްގެ މަތިން މިސްކިތެއް އަޅައިދިނުމަށް އެ ކުންފުނިން ހުށަހެޅި ކަމަށެވެ.

އެ ހުށަހެޅުމާ ގުޅިގެން އިސްލާމިކް މިނިސްޓްރީއާއި އެސްޖޭއާ ދެމެދު ކުރެވުނު މަޝްވަރާތަކުގައި ދެފަރާތަށް އެއްބަސްވުމަށް އާދެވިފައިވާތީ، އެ މައްސަލަ ކޯޓުން ބޭރުގައި ހައްލުކުރުމަށް ނިންމައި، މިއަދު ދެފަރާތުން އެއްބަސްވި ކަންތައްތަކުގެ މައްޗަށް އެކުލެވޭ ސެޓްލްމަންޓް އެއްބަސްވުމެއްގައި ވަނީ ސޮއިކޮށްފައެވެ.

އިސްލާމިކް މިނިސްޓްރީން ބުނީ، މި ޕްރޮޖެކްޓަށް ޖުމުލަ 35 މިލިއަން ރުފިޔާ ހަރަދުވާނެކަމަށެވެ. އަދި އެއްބަސްވުމުގެ ދަށުން މިސްކިތެއް އަޅާނީ ހުޅުމާލެ ފޭސް ދޭއްގައި ކަމަށާއި އެތަނަކީ މެއިން ހޯލް އަދި އައުޓް ޑޯއާއެކު 3000 މީހުންނަށް ނަމާދުކުރެވޭ އިންތިޒާމު ހަމަޖެހިފައިވާ މިސްކިތެއް ކަމަށް އެމިނިސްޓްރީން ހާމަކޮށްފައިވެއެވެ.

އެ އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ. އަހުމަދު ޒާހިރުއެވެ. އެސްޖޭގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ޝިހާދު އިބްރާހީމެވެ.

ސަރުކާރާއެކުވެފައިވާ އެއްބަސްވުމާއި އެއްގޮތަށް މަސައްކަތްނުކުރާތީ އެއްބަސްވުން ބާތިލްކުރުމުން ލިބުނު ގެއްލުމުގެ ބަދަލުގެ ގޮތުގައި 111 މިލިއަން ރުފިޔާ ހޯދުމަށް އެސްޖޭ ކޮންސްޓަރަކްޝަނުން ދައުލަތާއި ދެކޮޅަށްް ސިވިލްކޯޓުގައި ދައުވާކުރިއެވެ. ނަމަވެސް އެއްބަސްވުން ބާތިލުކޮށްފައިވަނީ އެއްބަސްވުމާއި ހިލާފަށްކަމަށް ކަނޑައަޅާނެ ތަނެއް ނެތްކަމަށް ކޯޓުން ވަނީ ހުކުމްކޮށްފައެވެ.