ކޮމަންޑޫ ދާއިރާގެ ބައި-އިލެކްޝަންގައި އެމީހަކު ރަޖިސްޓަރ ކޮށްފައިވާ ވޯޓު ފޮއްޓާމެދު ޝަކުވާ ހުށަހެޅުމަށް އިލެކްޝަންސް ކޮމިޝަނުން ހުޅުވާލައިފިއެވެ.

އިލެކްޝަންސް ކޮމިޝަނުން ކޮށްފައިވާ އިއުލާނެއްގައި ބުނެފައިވަނީ އެމީހަކު ވޯޓުލުމަށް ރަޖިސްޓްރީ ކޮށްފައިވާ ފޮށްޓާމެދު ޝަކުވާ ހުށަހެޅުމުގެ ފުރުޞަތު ޖަނަވަރީ 26 ވާ ބުދަ ދުވަހުގެ ހެނދުނު 09:00 އިން ފެށިގެން ޖަނަވަރީ 27 ވާ ބުރާސްފަތި ދުވަހުގެ މެންދުރުފަހު 03:00 ގެ ނިޔަލަށް ހުޅުވާލާފައިވާކަމަށެވެ.

ވޯޓުލުމަށް ރަޖިސްޓަރީވެފައިވާ ތަނުގެ މަޢުލޫމާތާ ގުޅޭ ގޮތުން ޝަކުވާ ހުށަހަޅަން ބޭނުންވާނަމަ ޝަކުވާ ހުށަހަޅާނީ "ވޯޓު ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީއާ ބެހޭ ޝަކުވާ ހުށަހަޅާ ފޯމު"ން ކަމަށް އީސީން ބުނެއެވެ.

އިލެކްޝަންސް ކޮމިޝަނުން އިއްޔެ ބުނީ ކޮމަންޑޫ ދާއިރާގެ ބައި-އިލެކްޝަންގައި ޖުމްލަ ބަހައްޓާނީ 7 ވޯޓްފޮށި ކަމަށެވެ. އެގޮތުން ށ. ފޯކައިދޫ ސްކޫލްގައި 2 ފޮށި ބެހެއްޓުމަށް ހަމަޖެހިފައި ވާއިރު ކޮމަންޑޫ ގައި ހުންނަ ށ. އަތޮޅު ތަޢުލީމީ މަރުކަޒާއި އެރަށު ޕްރީސްކޫލްގައި 2 ވޯޓު ފޮށި ބަހައްޓާނެއެވެ. އަދި މާލޭ އިސްކަންދަރު ސްކޫލުގައިވެސް 2 ފޮށި ބެހެއްޓުމަށް ވަނީ ހަމަޖެހިފައެވެ. އޭގެއިތުރުން މަރޮށި އިޖްތިމާޢީ މަރުކަޒުގައި ބަހައްޓާނީ 1 ވޯޓް ފޮށްޓެވެ.

ކޮމަންޑޫ ދާއިރާގެ ބައި އިލެކްޝަންގެ ވޯޓުލުން ކުރިއަށް ގެންދާ ގޮތަށް ނިންމާފައިވަނީ އަންނަ ފެބްރުއަރީ މަހުގެ ފަސްވަނަ ދުވަހު އެވެ. ކޮމަންޑޫއާއި ފޯކައިދޫ އަދި މަރޮށި ހިމެނޭ މި ދާއިރާގައި 3316 މީހުންނަށް ވޯޓްލުމުގެ ހައްޤު ލިބިގެންވެއެވެ.