ތިލަމާލެ ބްރިޖްގެ މަސައްކަތްތައް ކުރިޔަށްދާތީ ސަމާލުވުމަށް ޓްރާންސްޕޯޓް މިނިސްޓްރީން އިލްތިމާސްކޮށްފިއެވެ.

ޓްރާންސްޕޯޓް މިނިސްޓްރީން ބުނީ މާލޭގެ ހުޅަނގު ދެކުނު ފަރާތުން ފެށިގެން ވިލިނގިއްޔާއި ގުޅީފަޅުގެ ދެކުނު ފަރާތުގެ މޫދާއި އަދި ތިލަފުށީގެ އިރު ދެކުނު ކޮޅާއި ދެމެދުގެ ސަރަޙައްދެއްގައި ޕްލެޓްފޯރމްތަކެއް ބަހައްޓައިގެން މަސައްކަތްތަކެއް ކުރަމުންދާކަމަށެވެ. އެހެންކަމުން އެ މިނިސްޓްރީން ވަނީ ދަތުރުކުރާ އުޅަނދުފަހަރު މި ޕްލެޓް ފޯމުތަކަށް ކައިރި ނުކުރުމަށާއި އަދި ޕްލެޓްފޯމްތަކަށް އުނދަގޫ ނުވާނެގޮތަކަށް ރައްކާތެރިކަމާއެކު ދަތުރުތައްކުރުމަށް އުޅަނދުފަހަރުގެ ކެޕްޓަނުންނަށާއި އުޅަނދު ފަހަރުގެ ވެރިންނަށް އަދި އުޅަނދުފަހަރު އޮޕަރޭޓް ކުރާ ފަރާތްތަކަށް އިލްތިމާސް ކޮށްފައެވެ.

މީގެއިތުރުން 27 ޖެނުއަރީން ފެށިގެން އެ ސަރަހައްދުގައި އެކި ސައިޒްތަކުގެ ޕްލެޓްފޯރމްތަކާއި ހެވީ އިކުއިޕްމަންޓްތައް ބޭނުންކުރަމުންދާނެކަމަށް ޕްލޭނިންގ މިނިސްޓްރީންވެސް ބުނެއެވެ. މި ގޮތުން މާލޭގެ ހުޅަނގު ދެކުނު ފަރާތުން ފެށިގެން ވިލިނގިލި އިރު ދެކުނު ކަންމައްޗާއި، ވިލިނގިލި ދެކުނު ފަރާތުގެ މޫދާއި، ވިލިނގިލި ހުޅަނގުދެކުނު ކަންމަތިން ފެށިގެން ގުޅީފަޅު އިރުދެކުނު ކަންމައްޗާއި، އަދި ގުޅީފަޅު ހުޅަނގު ދެކުނު ފަރާތުން ފެށިގެން ތިލަފުށީ އިރު ދެކުނު ކަންމައްޗަށް އެއްވެސް ބޭނުމަކަށް މޫދަށް އެރި އުޅުމަކީ ރައްކާތެރިކަމެއް ނޫންކަމަށް މިނިސްޓްރީން ބުނެއެވެ.

ޕްލޭނިން މިނިސްޓްރީން ބުނީ މިވަގުތު ކުރިއަށްދަނީ ގްރޭޓާރ މާލެ ކަނެކްޓިވިޓީ – މާލެ ތިލަފުށި ލިންކް މަޝްރޫޢު ހަވާލުކޮށްފައިވާ ކޮންޓްރެކްޓަރ އެފްކޯންސް އިންފްރާސްޓްރަކްޗަރގެ ފަރާތުން ތައްޔާރުކުރާ ޑީޓެއިލް ޑިޒައިންއަށް ބޭނުންވާ ޖިއޯޓެކްނިކަލް ސާރވޭތަކެއްކަމަށެވެ.

ސާވޭގެ މަސައްކަތްތައް ނިންމައި، ގްރޭޓަރ މާލެ ކަނެކްޓިވިޓީ ބްރިޖްގެ ޢަމަލީ މަސައްކަތްތައް އަންނަމަހު ފެށޭވަރުވާނެކަމަށް ޕްލޭނިން މިނިސްޓްރީން ބުނެއެވެ. ބްރިޖްގެ މަސައްކަތަށް މާލެއިން ބޭނުންވާ ސައިޓް ތައްޔާރުކުރުމަށް، އިންޑަސްޓްރިއަލް ވިލެޖުން ބިން ކަނޑައަޅާ އެބިން ހުސްކޮށް މިހާރު ވަނީ ސާފުކޮށްފައެވެ.

ގްރޭޓަރ މާލެ ކަނެކްޓިވިޓީ ބްރިޖްގެ މަސައްކަތް މިދިޔަ އަހަރުގެ އޮގަސްޓްމަހުގެ 26 ވަނަ ދުވަހު ހަވާލުކޮށްފައިވަނީ އިންޑިއާގެ އެފްކޮންސް ކުންފުންޏާއެވެ. ގްރޭޓަރ މާލެ ކަނެކްޓިވިޓީ ބްރިޖް މަޝްރޫޢުގެ ދަށުން މާލެ، ވިލިމާލެ، ގުޅީފަޅު އަދި ތިލަފުށި ގުޅާލާނެއެވެ.

6.7 ކިލޯ މީޓަރު ދިގު މި ލިންކްގެ، ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 ކިލޯ މީޓަރު ހުންނާނެއެވެ. އަދި ފުން ފަޅުތަކުގައި 1.45 ކިލޯ މީޓަރަށް މެރިން ވިއަރޑަކްޓް، އަދި މޫދު/ ގޮނޑުދޮށުގައި 2.32 ކިލޯ މީޓަރަށް މެރިން ވިއަރޑަކްޓް އަދި ބިމާ އެއްހަމައެއްގައި 2.96 ކިލޯ މީޓަރުގެ މަގު ހެދުން ހިމެނެއެވެ.

މިއީ 500 މިލިއަން ޑޮލަރު ނުވަަތަ 7 ބިލިއަނަށްވުރެ ގިނަ ރުފިޔާގެ މަޝްރޫޢެކެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓާއެކުއެވެ.