ރާއްޖޭން ބޭރުގެ އާގު ބޯޓެއްގައި އޮތް ހާލު ބޮޑު ބަލި މީހަކަށް އެމްއެންޑީއެފް ސަދަން އޭރިއާ ކޮމާންޑުން އެހީތެރިކަން ފޯރުކޮށްދީފިއެވެ.

އެމްއެންޑީއެފުން ބުނީ ސައުތު އެފްރިކާއިން ފުރައިގެން ސިންގަޕޫރަށް ދަތުރުކުރި ލައިބޭރިއާގެ ކާގޯ ބޯޓެއް ކަމުގައިވާ "ޓްރޫ ޗެމްޕިއަން" ގައި އޮތް ހާލު ބޮޑު ބަލި މީހާއާ ގުޅޭ ރިޕޯޓް އެމްއެންޑީއެފް ސަދަން އޭރިއާ ކޮމާންޑަށް ލިބުނީ ޖަނަވަރީ 28 ވަނަ ދުވަހުގެ ހަވީރު 16:53 ހާއިރުކަމަށެވެ. އަދި އޭރު މި ބޯޓް ދަތުރު ކުރަމުން ދިޔައީ ސ.ގަމުގެ ހުޅަނގު ދެކުނުން 235 ނޯޓިކަލް މޭލު ބޭރުންކަމަށް އެމްއެންޑީއެފުން ބުނެފައިވެއެވެ.

ސަރުކާރުގެ ކަމާބެހޭ އިދާރާތަކުގެ ހުއްދައާއެކު މި ބޯޓު، ސ. ގަމު ދެކުނުން 3 މޭލަށް ކައިރި ކުރުމުން އެމްއެންޑީއެފް ސަދަން ކޮމާންޑު، ކޯސްޓްގާޑް ފޯތު ސްކޮޑްރަންގެ ހާބަރކްރާފްޓް 105 ލޯންޗް ވަނީ ޑޮކްޓަރުންގެ ޓީމަކާއެކު ބޯޓު އޮތް ސަރަހައްދަށް ގޮސްފައެވެ. އަދި ބަލިމީހާ މިއަދު ހެނދުނު 11:20 ހާއިރު ސ. ހިތަދޫއަށް ގެންގޮސް، އެމްބިއުލާންސްގައި އައްޑޫ އިކުއެޓޯރިއަލް ހޮސްޕިޓަލަށް ގެންގޮސްފައިކަމަށް އެމްއެންޑީއެފްއިން ބުނެއެވެ.

ވިއެޓްނާމަށް ނިސްބަތްވާ މި ބަލިމީހާ އައްޑޫ އިކުއެޓޯރިއަލް ހޮސްޕިޓަލަށް ގެންގޮސްފައި ވަނީ "ހެޕަޓައިޓިސް ވިތު ހައިޕަރލިބިރޫބިނީމިއާ" ކިޔާ ބަައްޔެއް ޖެހި އަވަސް ފަރުވާއަށް ބޭނުންވެގެންކަމަށް އެމްއެންޑީއެފުން ބުނެފައިވެއެވެ.