ހިޔާ ފްލެޓަކުން 1300 ޑޮލަރާއި ތިން ފޯނު ވަގަށް ނަގައިފިއެވެ.

ފުލުހުން މިއަދު ބުނީ ހުޅުމާލޭ 113 ވަނަ ފްލެޓުން ވައްކަން ކޮށްފައިވާ ކަމުގެ މައުލޫމާތު އެއިދާރާއަށް ރޭ 03:19 ގައި ލިބިފައިވާ ކަމަށެވެ. އަދި އެ ފްލެޓުން 1300 އަށްވުރެ ގިނަ ޑޮލަރާއި ތިން ފޯނު ވަގަށް ނަގާފައި ވާކަމަށްވެސް ފުލުހުން މަޢުލޫމާތުދީފައިވެއެވެ.

ފުލުހުން ބުނީ އެކަމާއި ގުޅިގެން އަދި މިހާތަނަށް އެއްވެސް މީހަކު ހައްޔަރު ކޮށްފައި ނުވާކަމަށެވެ. ނަމަވެސް މައްސަލަ ތަހުގީގު ކުރަމުންދާ ކަމަށް ފުލުހުން މަޢުލޫމާތުދެއެވެ.

ހިޔާ ފްލެޓަކުން ބޮޑު ވައްކަމެއް ކޮށްފައިވާއިރު ހިޔާ ފްލެޓްތަކުގެ ސަލާމަތީ ކަންތައްތައް އެންމެ އެކަށީގެންވާ ގޮތެއްގައި ނުބެލެހެއްޓޭކަމުގެ ޝަކުވާ ފްލެޓްތަކުގައި ދިރިއުޅޭ ފަރާތްތަކުން ދަނީ ކުރަމުންނެވެ. އެކަމަށް ޙައްލެއް ހޯދުމަށްޓަކައި އެޗްޑީސީން މިހާރުވަނީ ހިޔާ ފްލެޓްތަކުގައި ދިރިއުޅޭ ރައްޔިތުންގެ ރައްކާތެރިކަމަށާއި އެތަނުގެ ސާފުތާރިހުކަން ދެމެހެއްޓުމަށް ސެކިއުރިޓީ ބެލެހެއްޓުމުގެ ޚިދުމަތް ދޭން ފަށާފައެވެ.