އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ ކޮމަންޑޫ ދާއިރާގެ ބައި-އިލެކްޝަނަށް ޕްރިންޓްކޮށްފައިވަނީ 3349 ވޯޓު ކަރުދާސްކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަނުން ބުނީ މި އިންތިޚާބުގައި ވޯޓު ދިނުމުގެ ހައްގު ލިބިފައިވާ މީހުންގެ އަދަދަކީ 3309 ކަމަށެވެ. އެހެންކަމުން އިތުރަށް ޕްރިންޓްކޮށްފައިވަނީ 40 ވޯޓު ކަރުދާހެވެ. ވޯޓު ކަރުދާސް ޗާޕުކޮށްފައިވަނީ ނޮވެލްޓީ ޕްރިންޓަރސް އެންޑް ޕަބްލިޝަރސް ޕްރައިވެޓް ލިމިޓެޑުން ކަމަށް އިލެކްޝަންސް ކޮމިޝަނުން ވަނީ ބުނެފައެވެ.

އިލެކްޝަންސް ކޮމިޝަނުން ބުނެފައިވަނީ ކޮމަންޑޫ ދާއިރާގެ ބައި-އިލެކްޝަންގައި ޖުމްލަ ބަހައްޓާނީ 7 ވޯޓްފޮށި ކަމަށެވެ. އެގޮތުން ށ. ފޯކައިދޫ ސްކޫލްގައި 2 ފޮށި ބެހެއްޓުމަށް ހަމަޖެހިފައި ވާއިރު ކޮމަންޑޫ ގައި ހުންނަ ށ. އަތޮޅު ތަޢުލީމީ މަރުކަޒާއި އެރަށު ޕްރީސްކޫލްގައި 2 ވޯޓު ފޮށި ބަހައްޓާނެއެވެ. އަދި މާލޭ އިސްކަންދަރު ސްކޫލުގައިވެސް 2 ފޮށި ބެހެއްޓުމަށް ވަނީ ހަމަޖެހިފައެވެ. އޭގެއިތުރުން މަރޮށި އިޖްތިމާޢީ މަރުކަޒުގައި ބަހައްޓާނީ 1 ވޯޓް ފޮށްޓެވެ.

އަންނަ ހޮނިހިރުދުވަހު ބާއްވާ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީ، ޕީޕީއެމް އަދި އެމްއެންޕީން ވާދަކުރެއެވެ. މި އިންތިހާބަކީ އެންމެފަހުން ބޭއްވި ލޯކަލް ކައުންސިލްގެ އިންތިހާބަށްފަހު އެންމެ ފޯރިގަދަކޮށް ކުރިއަށްދާ އިންތިހާބެވެ.

މަޖިލީހުގެ ކޮމަންޑޫ ދާއިރާގެ ގޮނޑި ހުސްވީ އެ ދާއިރާގެ މެމްބަރު ހުސައިން ވަހީދު އަވަހާރަވުމާއި ގުޅިގެންނެވެ.