މިދިޔަ ހޮނިހިރު ދުވަހު ކުރިޔަށްދިޔަ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ދާއިމީ ނަތީޖާ އިލެކްޝަންސް ކޮމިޝަނުން މިއަދު އިޢުލާނުކޮށްފިއެވެ.

އިންތިޚާބުގެ ދާއިމީ ނަތީޖާ އިއުލާން ކުރުމަށް ބާޖަމާލުއްދީނުގައި ހުންނަ އިލެކްޝަންސް ކޮމިޝަންގެ އިންތިޚާބީ މަރުކަޒުގައި ބޭއްވި ރަސްމިއްޔާތުގައި އިލެކްޝަންސް ކޮމިޝަންގެ ރައީސް ފުއާދު ތައުފީޤު ވިދާޅުވީ މި އިންތިޚާބަކީ މިނިވަން އިންސާފުވެރި އިންތިޚާބެއް ކަމަށެވެ.

އޭގެ އިތުރުން ޑިމޮކްރެސީގެ ރޫޙާ އެއްގޮތަށް އިންތިޚާބުގެ ކަންތައްތައް ކުރިއަށް ގެންދިއުމަށް ހުރިހާ ކެނޑިޑޭޓުންގެ ފަރާތުން ދެއްވި އެއްބާރުލެއްވުމަށް ފުއާދު ވަނީ ޝުކުރު އަދާކުރަށްވާފައެވެ. ފުއާދު ވިދާޅުވީ މިއިންތިޚާބުގެ ނަތިޖާއަށް ބަދަލު އަންނަފަދަ ޝަކުވާއެއް ހުށަހެޅިފައި ނުވާކަމަށެވެ.

މިއިންތިހާބުގައި ވޯޓްލީ މީހުންގެ ޖުމްލަ އަދަދަކީ 2،932 އެވެ. 47 ވޯޓް ބާތިލުވެފައިވާއިރު ސައްހަ ވޯޓްގެ އަދަދަކީ 2،885 ވޯޓެވެ.

އިލެކްޝަން ކޮމިޝަނުން އިޢުލާނުކޮށްފައިވާ އިންތިޚާބުގެ ދާއިމީ ނަތީޖާ ދައްކާގޮތުން އިންތިޚާބު ކާމިޔާބުކުރެއްވި އެމްޑީޕީގެ މުޙައްމަދު ރާޝިދަށް 1401 ވޯޓު ލިބިފައިވާއިރު ޕީޕީއެމްގެ މޫސާ ފަތުޙީއަށް ލިބިފައިވަނީ 1161 ވޯޓެވެ. އަދި އެމްއެންޕީގެ އަބްދުލް ހަންނާނަށް ލިބިފައިވަނީ 323 ވޯޓެވެ.

މި އިންތިހާބުގައި ވޯޓްލުމުގެ ހައްގު 3،309 މީހަކަށް ލިބިފައިވާއިރު ވޯޓްލާފައިވަނީ 88.61 ޕަސެންޓް މީހުންނެވެ.