ބިދޭސީންގެ ޑިޕޮސިޓް ފައިސާ ސަރުކާރުގެ މާލިއްޔަތުގައި ހުރިތޯ ބަލަންޖެހޭކަމަށް މޯލްޑިވްސް ނޭޝަނަލް ޕާޓީ، އެމްއެންޕީގެ ނާއިބު ރައީސް އަހުމަދު ޝަރީފް ވިދާޅުވެއްޖެއެވެ.

ޝަރީފް މިބީދައިން ވިދާޅުވީ ބިދޭސީންގެ ޑިޕޮސިޓް ފައިސާގެ ހިސާބުތައް ބެލެހެއްޓުމުގައި ގާނޫނުގައި ބަޔާންކޮށްފައިވާގޮތަށް މޯލްޑިވްސް އިމިގްރޭޝަނުން އަމަލުކޮށްފައިނުވާކަމަށް އޮޑިޓަރ ޖެނެރަލް އޮފީހުން އާންމުކޮށްފައިވާ މޯލްޑިވްސް އިމިގްރޭޝަންގެ 2018 ވަނަ އަހަރުގެ އޮޑިޓް ރިޕޯޓުގައި ހާމަކުރުމާ ގުޅިގެންނެވެ.

މި މައްސަލާގައި އިކޮނޮމިކް މިނިސްޓްރީން ބުނެފައިވަނީ އަމިއްލަ ފަރުދުންނާއި ވިޔަފާރިތަކުން، އެފަރާތްތަކުގެ މަސައްކަތަށް ބިދޭސީން ރާއްޖެ ގެނައުމަށް ދައްކާފައިވާ ޑިޕޮސިޓް ފައިސާގެ ރިފަންޑް ބޭނުންވާނަމަ މިއަހަރުގެ 20 ފެބްރުއަރީ އިން 20 ޖޫންގެ ނިޔަލަށް އެ ފުރުސަތު ހުޅުވާލާފައިވާކަމަށެވެ. އަދި މި މުއްދަތުގެ ތެރޭގައި ޑިޕޮސިޓް ފައިސާ ރީފަންޑް ކޮށްދިނުމަށް އެދި ހުށަނާޅާ ފަރާތްތަކަށް އިތުރު ފުރުސަތެއް ދެވެން ނޯންނާނެކަމަށްވެސް އިކޮނޮމިކް މިނިސްޓްރީން ބުނެއެވެ.

ބިދޭސީންގެ ޑިޕޮޒިޓް ފައިސާގެ މައްސަލާގައި ޝަރީފް ވިދާޅުވީ ބިދޭސީންގެ ޑިޕޮސިޓް ފައިސާއަކީ ބިދޭސީ މީހާ ފުރީމަ އަނބުރާ ލިބެންޖެހޭ ފައިސާއެއް ކަމަށެވެ. ނަމަވެސް ޑިޕޮސިޓް ފައިސާ ދައްކާފައި ބިދޭސީ މީހާއަށް ނާދެވުނަސް އަދި ފުރައިގެން ދިޔައިމަވެސް އެފައިސާ ނުލިބޭ ކަމަށް ޝަރީފް ވިދާޅުވިއެވެ.

"ބިދޭސީންގެ ޑިޕޮސިޓް ފައިސާ ސަރުކާރުގެ މާލިއްޔަތުގައި ހުރިތޯ ބަލަންޖެހޭ." ޝަރީފް ވިދާޅުވެފައިވެއެވެ.

މޯލްޑިވްސް އިމިގްރޭޝަންގެ 2018 ވަނަ އަހަރުގެ އޮޑިޓް ރިޕޯޓުގައި ބުނެފައިވަނީ ބިދޭސީންގެ ޑިޕޮޒިޓް ފައިސާގެ ތެރެއިން ރިފަންޑުނުކޮށް ދައުލަތުގެ އާމްދަނީއަށް ޖަމާކުރަންޖެހޭ ފައިސާއާއި، ވަކިވަކި ޑިޕޮސިޓް އެކައުންޓްތަކުގެ ބާކީ އޮޑިޓް އޮފީހަށް ކަށަވަރުކުރެވިފައި ނުވާކަމަށެވެ.

އެގޮތުން ޑިޕޮޒިޓް ފައިސާގެ ބާކީގެގޮތުގައި 2018 ވަނަ އަހަރު ނިމުނުއިރު އެއް ބިލިއަން، ހަ ސަތޭކަ ފަންސަވީސް މިލިއަން، ހަތަރު ސަތޭކަ އަށްހާސް، ތިން ސަތޭކަ ސާޅިސް ނުވަ ރުފިޔާ ހުރިކަމަށް ޕަބްލިކް އެކައުންޓިންގ ސިސްޓަމްގެ ހިސާބުތަކުން ދައްކާފައިވާކަން އޮޑިޓް އޮފީހުން ވަނީ ހާމަކޮށްފައެވެ.

މީގެ ކުރިން އިކޮނޮމިކް މިނިސްޓްރީން ބުނެފައިވަނީ އެކްސްޕެޓް އޮންލައިން ސިސްޓަމްގެ ތެރެއިން ބިދޭސީންގެ އަތުން ސަރުކާރަށް ނަގާފައިވާ ޑިޕޮސިޓް ފައިސާ އަނބުރާ ދިނުމުގެ މަސައްކަތް، އިކޮނޮމިކް މިނިސްޓްރީން 2019 ވަނަ އަހަރު ފަށާފަވާ ކަމަށެވެ. އެގޮތުން ޑިޕޮސިޓް ފައިސާގެ މިހާތަނަށް 549,241,703 ރުފިޔާ އޭގެ ހައްގުވެރި ފަރާތްތަކާއި ހަވާލު ކުރެވިފައިވާކަމަށް މިނިސްޓްރީން ބުނެއެވެ.