ހުސްވެފައިވާ އެންޓި ކޮރަޕްޝަން ކޮމިޝަން (އޭސީސީ) ގެ މެންބަރު ކަމަށް އައްޔަން ކުރަން ރައީސް އިބްރާހިމް މުހައްމަދު ޞާލިޙް ފޮނުއްވެވި ފަސްބޭފުޅަކަށް ރުހުން ދޭން ފެންނަ ކަމަށް މަޖިލީހުން ފާސްކޮށްފިއެވެ.

އޭސީސީގެ މެމްބަރުކަމަށް އައްޔަނުކުރަން ރައީސް އިބްރާހިމް މުހައްމަދު ސާލިޙު ފޮނުއްވި ނަންތައް ދިރާސާކުރުމަށް މަޖިލީހުގެ މިނިވަން މުވައްސަސާތަކާބެހޭ ކޮމެޓީއަށް ފޮނުވާފައިވަނީ މިދިޔަ މަހުގެ 28 ވަނަ ދުވަހު އެވެ.

މަޖިލީހުގެ މިއަދުގެ ޖަލްސާގައި ރައީސް ފޮނުއްވި ފަސް ބޭފުޅުންނަށްވެސްވަނީ ރުހުން ދީފައެވެ. އެގޮތުން އަލްއުސްތާޛް އާދަމް ޝާމިލަށް 42 ވޯޓު ލިބިވަޑައިގެންނެވިއިރު، އަލްއުސްތާޛް އަބްދުއްސަލާމަށް 43 ވޯޓު ލިބިވަޑައިގަތެވެ. އަދި އަލްއުސްތާޛް ޠާހާ މުހައްމަދަށް 40 ވޯޓު ލިބިވަޑައިގެންނެވިއިރު އަލްއުސްތާޛާ ޝަޒްނާ ހާޝިމަށް 42 ވޯޓު އަދި އަލްއުސްތާޛާ ޝިޔާމާ މުހައްމަދަށް 42 ވޯޓު ލިބިވަޑައިގެންނެވިއެވެ.

ރައީސް ޞާލިޙް މަޖިލީހަށް ފޮނުއްވި ނަންފުޅުތަކުގެ ތެރޭގައި ހިމެނޭ އާދަމް ޝާމިލަކީ އޭސީސީގައި އިންވެސްޓިގޭޓަރެއްގެ ގޮތުގައި ގިނަ ދުވަސްތަކެއް ވަންދެން މަސައްކަތްކުރެއްވި ބޭފުޅެކެވެ. އަދި ޢަބްދުއްސަލާމް ޢަލީ އަކީ މިހާރު ވެސް އޭސީސީގެ އިންވެސްޓިގޭޓަރުންގެ ހެޑްގެ ގޮތުގައި ހުންނެވި ބޭފުޅާއެވެ. އަދި ޠާހާ މުޙައްމަދަކީ ރައީސް އުފެއްދެވި ފްލެޓް ކޮމިޓީގެ މެމްބަރަކަށްވާއިރު، ޝިޔާމާ މުޙައްމަދަކީ އިލެކްޝަންސް ކޮމިޝަންގެ ލީގަލް ޑިޕާޓްމަންޓްގެ ހެޑެވެ.

އޭސީސީގެ މެމްބަރުންގެ މަގާމު ހުސްވީ އެކޮމިޝަންގައި ތިއްބެވި ބޭފުޅުން މަގާމުން އިސްތިއުފާ ދެއްވުމާއި ގުޅިގެންނެވެ. އޭސީސީގެ މެމްބަރު ކަމަށް ކުރިމަތިލުމަށް ދެ ފަހަރެއްގެ މަތިން ރައީސް އޮފީހުން ފުރުސަތު ހުޅުވާލާފައިވާއިރު އޭސީސީއަށް މެންބަރުން އައްޔަންކުރުމަށް ރައީސް ޞާލިޙް މަޖިލީހަށް ނަންތަކެއް ފޮނުއްވާފައިވަނީ މިމަހުގެ 23 ވަނަ ދުވަހު އެވެ.

އޭސީސީގެ ގާނޫނުގައި އެ ކޮމިޝަންގެ މެންބަރަކު އިސްތިއުފާ ދެއްވައިފިނަމަ އެ ދުވަހުން ފެށިގެން 60 ދުވަހުގެ ތެރޭގައި މީހަކު އައްޔަންކުރަންވާނެ ކަމަށް ބުނެފައިވެއެވެ. އެހެން ނަމަވެސް ގާނޫނުގައި އެކަމަށް އޮންނަ މުއްދަތު މިހާރު ވަނީ ފަހަނައަޅައި ގޮސްފައެވެ.