އިޤްތިޞާދީ ވަޒީރު ފައްޔާޒު އިސްމާޢީލްގެ ބުރަ މަަސައްކަތް ފޮރުވަން އުޅުމަކީ "އައްޗިކަމެއް" ކަމަށް އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.

މެންބަރު ޝިފާއު މިމޭރުމުން ވިދާޅުވީ އެންމެކުޑަ އުޖޫރަ އަކީ އެމްޑީޕީ އެޖެންޑާ-19ގެ ސިޔާސަތެއް ކަމަށާއި އެކަމުގެ ކްރެޑިޓް ވަކި ވަޒީރަކަށް ނުނެންގެވޭނެ ކަމަށްބުނެ ސަރުކާރުގައި ތިއްބެވި އެމްޑީޕީގެ ބައެއް ފަރާތްތަކުން ފާޑުވިދާޅުވަމުން ގެންދަވާތީ އެކަމަށް ރައްދު ދެއްވުމުގެ ގޮތުންނެވެ.

އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރަށްވާ އުސްތާޛު ފައްޔާޒުގެ ކެމްޕޭން ޓީމުން ބުނަމުން ދަނީ އެންމެކުޑަ އުޖޫރަ ތަންފީޒު ކުރެވުނީ ފައްޔާޒް ކުރެއްވި ބުރަ މަސައްކަތުން ކަމަށެވެ. ނަމަވެސް އިންތިޚާބުގައި ވާދަ ކުރަށްވާ އުސްތާޛު އިމްތިޔާޒްގެ ޓީމުން ބުނަމުން ދަނީ އެންމެކުޑަ އުޖޫރަ ފާސްކުރީ އެމްޑީޕީ މެޖޯރިޓީ އޮންނަ ރައްޔިތުންގެ މަޖިލީހުން ކަމަށާއި, އެކަން ތަންފީޒުކުރެއްވީ ރައީސް ‎އިބްރާހިމް މުހައްމަދު ޞާލިޙު ކަމަށެވެ.

އެކަމާގުޅިގެން މެންބަރު ޝިފާއު ވިދާޅުވީ އެންމެ ކުޑަ އުޖޫރަ ކަނޑައެޅުމުގައި އިޤްތިޞާދީ ވަޒީރު އުސްތާޛު ފައްޔާޒް އިސްމާއީލް ކުރެއްވި މަސައްކަތް މަޖިލީހުގެ ކަމާބެހޭ ކޮމިޓީގެ މެންބަރެއްގެ ހައިސިއްޔަތުން ވަރަށް ގާތުން ފެނިވަޑައިގެންނެވި ކަމަށެވެ. އަދި ވަކި ވަޒީރަކު ކުރި ބުރަ މަަސައްކަތް ފޮރުވަން އުޅުމަކީ އައްޗިކަމެއް ކަމަށް ޝިފާއު ވިދާޅުވިއެވެ.

"ވަކި ވަޒީރަކު ކުރި ބުރަ މަަސައްކަތް ފޮރުވަން އުޅުމަކީ އައްޗިކަމެއް. ފަޔާއަކީ ހިތްވަރުގަދަ ހިންގުންތެެރިއެއް." ޝިފާއު ވިދާޅުވިއެވެ.

Minimum wage kadaelhumuga Minister @faya_i kurehvvi hithvaraa bura masahkath Majlisga mi masahkath hingi Commitee memberenge haisiyyathun dhekunin. Vaki vazeereh kuri bura masahkath foruvan ulhumakee v achii kameh. @faya_i akee hithvarugadha hinguntherieh. #MDPhingaalan https://t.co/ia9bpwaOiK

— MP Mohamed Shifau (@mhshifau) March 16, 2022

އެމްޑީޕީގެ އެތެރޭގެ އިންތިޚާބުގައި ޗެއާޕާސަން ހޮވުމުގެ އިތުރުން އަންހެނުންގެ ރޫހާއި ޒުވާނުންގެ ރޫހުގެ އިސް މަގާމުތަކަށް ވެސް މެންބަރުން އިންތިޚާބު ކުރުމަށް ވަނީ ހަމަޖެހިފައެވެ. މި އިންތިޚާބު އޮންނާނީ އަންނަ މެއި މަހުގެ 14 ވަނަ ދުވަހުއެވެ.