މެލޭޝިއާގައި ކޯވިޑް-19 ފެތުރޭ މިންވަރު ދަށް ކުރެވިފައި ވާކަމަށާއި، އަދި މިގޮތަށް ދެމިގެން ދާނަމަ ޖޫން މަހުގެ 9 ގައި ސްކޫލް ތަކުގެ އިތުރުން އާންމު ތަންތަން ހުޅުވާލާނެ ކަމަށް ސަރުކާރުން ބުނެފިއެވެ.

ނޫސްވެރިގެން ބައްދަލުވުމެއްގައި ވާހަކަ ދައްކަވަމުން، މެލޭޝިއާގެ ހެލްތު މިނިސްޓްރީގެ ޑިރެކްޓަރ ޖެނެރަލް ޑރ. ނޫރު ހިޝާމް ވިދާޅުވީ މިހާރު އެންމެ ކަންބޮޑުވެ ވަޑައިގަންނަވަނީ، އީދު ޗުއްޓީ އާ ދިމާކޮށް ލޮކްޑައުންއަށް ބޮޑެތި ލުއިތަކެއް ދިނުމުގެ ސަބަބުން އިތުރަށް ބަލި ފެތުރިދާނެތީއެވެ. އެހެންކަމުން، ލޮކްޑައުންއަށް އިތުރު ލުއެއްދީ ސްކޫލް ތަކާއި އާންމު ތަންތަން ހުޅުވާލުމަށް ނިންމާނީ ޖޫން 9 އާއި ހަމައަށް ހާލަތު ބެލުމަށް ފަހު ކަމުގައިވެސް ޑރ. ނޫރު ހިޝާމް ވިދާޅުވިއެވެ.

އޭނާ ވިދާޅުވީ ސްކޫލްތަކާއި އިޖުތިމާޢީ ދާއިރާގެ ހަރަކާތްތައް ހުޅުވާލުމަކީ މިމަސައްކަތުގައި ކުރިމަތިލާން ޖެހޭ އެންމެ ނުރައްކާތެރި ދަނޑިވަޅު ކަމަށެވެ. ލުއިދިނުމުގެ ސިޔާސަތުތައް ބަދަލެއް ގެންނަން ސަރުކާރުން ކަންބޮޑުވަނީ މި ސަބަބަށްޓަކާ ކަމަށް ޑިރެކްޓަރ ޖެނެރަލް ވިދާޅުވިއެވެ.

"މިކަން އޮތީ މެލޭޝިޔާ ރައްޔިތުންގެ އަތްމަތީގަ. އެސް އޯ ޕީގައިވާ ކަންތައްތަކަށް ރައްޔިތުން ކަމޭހިތާ ބޯލަނބާނަމަ ދެ އަކުރުގެ އަދަދު އެއް އަކުރަށް ވެސް ބަދަލު ކުރެވިދާނެ." ޑިރެކްޓަރ ޖެނެރަލް ވިދާޅުވިއެވެ.

އަދި މިބަލި މުޅިން ކޮންޓްރޯލްކުރުމަށް، ހެލްތު މިނިސްޓްރީއިން ދޭ އިރުޝާދު ތަކާ އެއްގޮތަށް އަމަލުކުރުމުގައި، އާންމުންގެ އެއްބާރުލުން ބޭނުންވާ ކަމަށްވެސް ޑރ. ނޫރު ހިޝާމް ވިދާޅުވެފައިވެއެވެ.

ކޯވިޑް-19 އާއި ގުޅިގެން މެލޭޝިޔާގެ އިމިގްރޭޝަން ޑިޕާޓްމެންޓުން ހިންގި އޮޕަރޭޝަންގައި އެޑިޕާރޓްމެންޓްގެ ބެލުމުގެ ދަށަށް ގެނަސް ޑިޕޯރޓް ކުރުމަށް ފެސިލިޓީތަކުގައި ބައިތިއްބާފައި ތިބި ގަވާއިދާ ހިލާފަށް އުޅޭ ބިދޭސީންގެ މެދުގައި މިބަލި ފެތުރޭ މިންވަރު އިތުރުވި ކަމުގައި ވީނަމަވެސް، މެލޭޝިއާގައި ކޯވިޑް-19 ފެތުރުން މިހާރު ވަނީ ވަރަށް ބޮޑަށް ކޮންޓްރޯލް ކުރެވިފައެވެ.