ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ނަންފުޅު ބޭނުންކޮށްގެން ފިތުނަ އުފައްދަން މަސައްކަތް ކުރުމަކީ ދެރަކަމެއްކަމުގައި ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.

ރާއްޖޭގެ އެންމެ ބޮޑު ސިޔާސީ ޕާޓީ އެމްޑީޕީގެ ޗެއަރޕާސަން ހޮވުމުގެ އިންތިހާބުގެ ވާދަވެރިކަން ވަރަށް ބޮޑުވެފައިވާ މި ދަނޑިވަޅުގައި މި އިންތިހާބުގެ އެކިއެކި ކެމްޕޭން ހަރަކާތްތަކުގައި ރައީސް ނަޝީދާއި ގުޅުވައި ދެ ކެނޑިޑޭޓުންގެ ފަރާތުން ވެސް ދަނީ ތަފާތު ވާހަކަތައް ދައްކަމުންނެވެ.

އެގޮތުން، އެމްޑީޕީގެ ޗެއަރޕަސަންގެ މަގާމަށް ކުރިމަތިލައްވާފައިވާ އިކޮނޮމިކް މިނިސްޓަރ ފައްޔާޒުގެ ޓީމުން މަސައްކަތް ކުރަމުންދަނީ ރައީސް ނަޝީދު އެމްޑީޕީން ބޭރު ކުރަން ކަމަށް، ޗެއަރޕާސަންގެ މަގާމަށް ވާދަކުރަށްވާ އަނެއް ކެންޑިޑޭޓު އިމްތިޔާޒު ފަހުމީ (އިންތި) ވަނީ ތުހުމަތު ކުރައްވާފައެވެ.

އިންތި މިފަދައިން ވާހަކަ ދައްކަވާފައިވަނިކޮށް، ނިހާދު މިއަދު ވިދާޅުވީ، އެމްޑީޕީން ރައީސް ނަޝީދު ބޭރުކުރާކަށް އެކަކުވެސް ނޫޅޭ ކަމަށާއި އަދި އެކަން ނުވެސް ކުރެވޭނެކަމަށެވެ.

ނިހާދު އިތުރަށް ވިދާޅުވީ، ރައީސް ނަޝީދުގެ ނަންފުޅު ބޭނުންކޮށްގެން ފިތުނަ ކުރަން މަސައްކަތް ކުރުމަކީ ދެރަ ކަމެއް ކަމަށެވެ. އަދި އެފަދަ ފިތުނަތަކުގެ ސަބަބުން ޕާޓީއަށް ލިބޭނީ ގެއްލުން ކަމަށާއި ރިވެތިކޮށް ދޮގު ނުފަތުރާ އުޅުއްވުމަށް ނިހާދު ވަނީ އިންތިގެ ޓީމަށް ގޮވާލާފައެވެ.

ރައީސް ނަޝީދު ޕާޓީން ބޭރުކުރަން އުޅޭކަމުގެ ތުހުމަތު އިންތި ކުރެއްވުމާއި ގުޅިގެން އައްޑޫ މީދޫ ދާއިރާގެ މެންބަރު ރޮޒޭނާ އާދަމް ވެސް މިއަދުވަނީ އިންތިއަށް ރައްދުދެއްވާފައެވެ.

އެމްޑީޕީގެ ތެރޭގައި ދެ ފެކްޝަން އުފެދިފައިވާކަން ހާމަވެފައިވާއިރު، ނިހާދު ފާހަގަ ކުރެވިފައިވަނީ ޗެއާޕާސަން އިންތިޚާބުގައި މިނިސްޓަރ ފައްޔާޒަށް ތާއީދު ކުރައްވާ ބޭފުޅެއްގެ ގޮތުގައެވެ.