ރޯދައަށް މާލޭގައި ތަރައްޤީކުރާ ވަގުތީ މާރުކޭޓުތައް މި ހަފްތާގެ ނިޔަލަށް ނިމޭނެކަމަށް މާލޭ ސިޓީ ކައުންސިލުން ހާމަކޮށްފިއެވެ.

މާލޭ ސިޓީ ކައުންސިލުން ބުނީ ރަމަޟާން މަހަށް ޚާއްސަކޮށްގެން މާލޭގެ ދެސަރަޙައްދަކާއި ވިލިމާލޭގައި ވަގުތީ މާރުކޭޓު ހެދުމަށް ނިންމާފައިވާކަމަށެވެ. އެގޮތުން ދެ މަސް ދުވަހުގެ މުއްދަތަކަށް ވަގުތީ މާރުކޭޓްތައް ހެދުމަށް ނިންމާފައިވަނީ ދަރުބާރުގޭގެ އިރުން އޮންނަ ހުސްބިމުގައާއި ތާޖުއްދީން ސްކޫލުގެ ހުޅަނގުން އޮންނަ ހުސް ބިމުގައާއި ވިލިމާލޭ ފެރީ ޓާމިނަލް ކައިރީގަ އެވެ.

މިތަންތަނުން ދޫކުރާނެ ގޮޅީގެ އަދަދު ކަށަވަރުވާނީ އެ ތަންތަނުގައި ޓެންޓް ޖަހައި ނިމުމުން ކަމަށް ކައުންސިލުން ވަނީ ބުނެފައެވެ. ޓެންޓު ޖެހުމަށްޓަކައި އެކަމަށް އެކަށޭނެ ފަރާތެއް ހަމަޖެއްސުމުގެ މަސައްކަތް ކައުންސިލުން ގެންދަނީ ކުރަމުންނެވެ.

ސިޓީ ކައުންސިލުން މީގެކުރިން ވަނީ ވަގުތީ މާރުކޭޓުގެ ގޮޅިއަށް އެދި ކުރިމަތިލުމުގެ މުއްދަތު މިއަދުގެ 2:00ގެ ނިޔަލަށް އިތުރު ކޮށްފައެވެ.

ވަގުތީ މާރުކޭޓުގެ ގޮޅިއަށްއެދި ފޯމް ހުށަހަޅަންޖެހެނީ ތައިސޭކޮށީގައި ހުންނަ ސިޓީ ކައުންސިލްގެ އާންމު ހިދުމަތްތަކާބެހޭ ބަޔަށެވެ.