އެކި މައްސަލަތަކާ ގުޅިގެން ހޯދަމުންދާ 45 ބިދޭސީންގެ ވަނަވަރު މޯލްޑިވްސް އިމިގްރޭޝަނުން ހާމަކޮށްފިއެވެ.

ފިލައިގެން އުޅޭ ކަމަށްބުނެ ބިދޭސީންތަކެއްގެ ފޮޓޯ އާއްމުކޮށް އިމިގްރޭޝަނުން ކުރި އިއުލާނެއްގައި ބުނެފައި ވަނީ، އެމީހުންނަކީ އެކި މައްސަލަތަކާ ގުޅިގެން ހޯދަމުން އަންނަ ބައެއް ކަމަށެވެ. އިމިގްރޭޝަނުން ބުނީ އެމީހުން 7 ދުވަހުގެ ތެރޭގައި "އެކްސްޕެޓްރިއޭޓް މޮނިޓަރިން އެންޑް ރެޕަޓްރިއޭޝަން ޑިވިޝަން" އަށް ހާޒިރުވުމަށް އަންގާކަމަށެވެ.

އިމިގްރޭޝަނުން ފޮޓޯ އާއްމުކުރި މީހުންގެ ތެރޭގައި ހިމެނެނީ ބަނގްލާދޭޝް 34 ރައްޔިތުންނާއި، އިންޑިއާގެ ތިން މީހަކާއި، ނައިޖީރިއާގެ ދެ މީހަކާއި ތައިލޭންޑާއި އިޓަލީ، ބްރިޓިޝް، ސްރީލަންކާ، ފިލިޕިންސް އަދި އިތިއޯޕިއާގެ މީހެކެވެ. އެމީހުންގެ ތެރޭގައި ހިމެނެނީ 8 އަންހެނަކާއި 37 ފިރިހެނުންނެވެ.

މިއީ މިހާތަނަށް އިމިގްރޭޝަނުން މިހާގިނަ ބަޔަކު ހޯދަން އިއުލާންކުރި ފުރަތަމަ ފަހަރެވެ.

ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ބޮޑުވެފައިވާއިރު އެމީހުން އަނބުރާ ޤައުމަށް ފޮނުވާލުމުގެ މަސައްކަތް ސަރުކާރުން ދަނީ ކުރަމުންނެވެ.