މި ސަރުކާރުގެ ފުރަތަމަ ކޮމިއުނިކޭޝަންސް މިނިސްޓަރ މުޙައްމަދު މަލީޙް ޖަމާލުގެ އޮފީސް ކޮޓަރިކޮޅު މަރާމާތުކުރުމުގައި ޤާނޫނާ ޚިލާފަށް ގިނަކަންތައްތައް ކޮށްފައިވާކަމަށް އެ އޮފީހުގެ އޮޑިޓް ރިޕޯޓުގައި ބުނެފިއެވެ.

އޮޑިޓް އޮފީހުން މިއަދު ނެރުނު ކޮމިއުނިކޭޝަންސް މިނިސްޓްރީގެ 2019 ވަނަ އަހަރުގެ އޮޑިޓް ރިޕޯޓުގައި ބުނެފައިވަނީ، މިނިސްޓަރުގެ ކޮޓަރިކޮޅާއި، މިނިސްޓްރީ ހިންގާ އިމާރާތުގެ ބްލޮކް-ބީ ރިލޮކޭޓްކުރުމަށް، ޖުމްލަ 795،000 (ހަތް ސަތޭކަ ނުވަދިހަފަސް ހާސް) ރުފިޔާ ޚަރަދުކޮށްފައިވާ ކަމަށެވެ.

އެގޮތުން އެމަސައްކަތް ކުރުމަށް އަމިއްލަފަރާތަކާ، 15 ސެޕްޓެމްބަރު 2019 ވަނަ ދުވަހު ޙަވާލުކޮށްފައިވާއިރު މިމަސައްކަތާގުޅޭ ބައެއްކަންކަން ދައުލަތުގެ މާލިއްޔަތުގެ ގަވާއިދާ ޚިލާފަށްކޮށްފައިވާކަމަށް ރިޕޯޓުގައި ވަނީ ބުނެފައެވެ.

އޮޑިޓް ރިޕޯޓްގައި ބުނެފައިވަނީ މަސައްކަތުގެ އެއްބަސްވުމުގައި ސޮއިކުރާ ތާރީޚުން ފެށިގެން 25 ދުވަސްތެރޭގައި މަސައްކަތް ނިންމަންޖެހޭނެކަމަށް، އެއްބަސްވުމުގައި ބަޔާންކޮށްފައިވާކަމަށެވެ. ނަމަވެސް

އެއްބަސްވުމުގައިވާ ތާރީޚަށް މަސައްކަތް ނިމިފައި ނުވާއިރު، މުއްދަތު އިތުރުކޮށްދިނުމަށް މަސައްކަތްކުރާ ފަރާތުން އެދިފައިވާކަން އެނގެން ނެތްކަމަށާއި މަސައްކަތް ނިމިފައިވަނީ 5 އޮކްޓޫބަރ 2020 ގައި ކަމަށް ރިޕޯޓުގައިވެއެވެ.

އޮޑިޓް ރިޕޯޓުގައި ބުނެފައިވަނީ މަސައްކަތް ލަސްވުމުން ލިކުއިޑޭޓެޑް ޑެމޭޖަސްއަށް 119،000 އަށް ވުރެ ބޮޑު އަދަދެއް އެރި އިރު، އެ މިންވަރު މަސައްކަތުގެ އަގުން އުނިކޮށްފައިނުވާކަމަށެވެ. އަދި ފަހުން އޮޑިޓަރުން އެކަން ފާހަގަކުރުމުން އުނިކޮށްފައިވަނީ 9،834 ރުފިޔާ ކަމަށެވެ.

އޭގެ އިތުރުން މަސައްކަތުގެ ރިޓެންޝަން ފައިސާ އުނިކޮށްފައި ނުވާއިރު 103،880 ރުފިޔާގެ އިތުރު މަސައްކަތެއް ހަމަ އެކުންފުންޏަށް އެއްބަސްވުމުގެ ބޭރުން އިޢުލާނުކުރުމެއްނެތި ޙަވާލުކޮށްފައިވާ ކަމަށް އޮޑިޓް ރިޕޯޓުގައިވަނީ ފާހަގަކޮށްފައެވެ.

އޮޑިޓްރިޕޯޓުގައި އިތުރަށް ބުނެފައިވަނީ މިނިސްޓްރީގެ ހަރުމުދަލުގެ ހިސާބުތައް ޤަވާއިދާ އެއްގޮތަށް ބަލަހައްޓާފައި ނެތް ކަމަށެވެ. އަދި އިދާރީ މަޤާމުތަކަށް ކޮންސަލްޓެންޓުން ހޯދާފައިވާކަންވެސް ވަނީ ފާހަގަކޮށްފައެވެ.