ކޯވިޑް-19 އަށް ރާއްޖެއިން އިތުރު 34 މީހުން ޕޮޒިޓިވް ވެއްޖެއެވެ.

މިއަދު ރާއްޖެއިން ބައްޔަށް ޕޮޒިޓިވްވި 34 މީހުންނާއެކު ރާއްޖެއިން ބައްޔަށް ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 1547 އަށް އަރައިފައެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިއަދު ރާއްޖެއިން ޕޮޒިޓިވްވެފައިވަނީ 12 ދިވެހިންނާއި ބަނގްލަދޭޝްގެ 21 މީހަކާއި އިންޑިއާ މީހެކެވެ.

މިއާއެކު މިހާރު ރާއްޖެއިން ބައްޔަށް ޕޮޒިޓިވް ވެފައިވާ ބަނގްލަދޭޝް މީހުންގެ އަދަދު 800 އަށްވުރެ މައްޗަށް އެރީއެވެ. އަދި ބައްޔަށް ޕޮޒިޓިވްވި ދިވެހިންގެ އަދަދު 540 އަށްވުރެ މައްޗަށް އެރީއެވެ. މީގެއިތުރުން ރާއްޖޭގައި ކޯވިޑް-19 އަށް ޕޮޒިޓިވް ވެފައިވާ އިންޑިއާގެ ރައްޔިތުންގެ އަދަދު ވެސް ވަނީ 150 އަށް އަރާފައެވެ.

ބައްޔަށް ފަރުވާ ލިބިގެން ރަނގަޅުވެފައިވާ މީހުންގެ އަދަދު މިހާރު ވަނީ 190 އަށްވުރެ މަތީގައެވެ.