ޅ. ކުރެންދޫ ކައުންސިލްގެ ރައީސް އިންތިހާބު ކުރުމަށް މިއަދު ކުރިއަށްގެންދިޔަ ބައި-އިލެކްޝަން ޕީޕީއެމްގެ ކެންޑިޑޭޓް އިސްމާއީލް މަދީހް ކާމިޔާބު ކުރައްވައިފިއެވެ.

މި އިންތިޚާބުގައި ވާދަކުރީ ވެރިކަންކުރާ ކޯލިޝަންގެ މައިޕާޓީ އެމްޑީޕީގެ ކެނޑިޑޭޓް އަލީ ނަސީމާއި އިދިކޮޅު ޕީޕީއެމްގެ ކެނޑިޑޭޓް އިސްމާއީލް މަދީހެވެ. އިންތިޚާބުގެ ވަގުތީ ނަތީޖާ ދައްކާގޮތުން އިސްމާޢީލް މަދީޙް މި އިންތިޚާބު ކާމިޔާބުކުރީ 49 ވޯޓްގެ ތަފާތުންނެވެ.

މިއިންތިޚާބުގައި ޖުމުލަ 3 ވޯޓުފޮށި ބަހައްޓާފައިވާއިރު ކުރެންދޫގައި ބެހެއްޓި ދެ ފޮށިން އެމްޑީޕީގެ ކެނޑިޑޭޓަށް ލިބިފައިވަނީ 366 ވޯޓެވެ. އަދި ޕީޕީއެމްގެ ކެނޑިޑޭޓް މަދީޙް ވަނީ 380 ވޯޓް ހޯދައިފައެވެ. އަދި މާލޭ ފޮށިން އެމްޑީޕީގެ ކެނޑިޑޭޓް 200 ވޯޓް ހޯދާފައިވާއިރު ޕީޕީއެމްގެ ކެނޑިޑޭޓް ވަނީ 235 ވޯޓް ހޯދައިފައެވެ.

ކުރެންދޫ ކައުންސިލްގެ ރައީސްގެ މަގާމު ހުސްވީ އެ މަގާމު މީގެ ކުރިން ފުރުއްވަމުން ގެންދެވި އެމްޑީޕީ މެމްބަރު އިބްރާހިމް ޝިމާއު އިސްތިއުފާ ދެއްވުމާ ގުޅިގެންނެވެ. އިންތިހާބު ކާމިޔާބުކުރެއްވި މަދީހް އަކީ މީގެ ކުރިން ވެސް ކުރެންދޫ ކައުންސިލްގެ ރައީސްކަން ކުރެއްވި ބޭފުޅެކެވެ.

ކުރެންދޫ ކައުންސިލްގެ ރައީސްގެ ގޮނޑި ޕީޕީއެމުން ކާމިޔާބު ކުރުމުން ކުރެންދޫ ކައުންސިލްގައި ދެން ތިއްބަވާނީ އެމްޑީޕީގެ ހަތަރު މެމްބަރުންނާއި ޕީޕީއެމްގެ މެމްބަރެކެވެ.