އެމްއެމްޕީއާރުސީގެ ޚިޔާނާތުގައި ހިމެނޭ ރ. ފުއްގިރީގެ ލީސް ރައިޓްސް ބަދަލުކުރުމުގެ މަސައްކަތް ފަށައިފިއެވެ.

ޓޫރިޒަމް މިނިސްޓްރީން ކޮށްފައިވާ އިޢުލާނެއްގައި ބުނެފައިވަނީ ޓޫރިސްޓް ރިޒޯޓެއް ތަރައްޤީކުރުމަށް އެމިނިސްޓްރީއިން ކުއްޔަށްދޫކޮށްފައިވާ ރ. ފުއްގިރި ކުއްޔަށް ދިނުމާބެހޭ ލީސް އެގްރީމަންޓްގެ ދަށުން، އެ ރަށް ކުއްޔަށްހިފާފައިވާ ފަރާތަށް ލިބިދީފައިވާ އެންމެހާ ހައްޤުތައް، އެހެންފަރާތަކަށް ބަދަލު ކުރުމުގެ ހުއްދައަށް އެދި އެފަރާތުން ހުށަހަޅުއްވާފައިވާކަމަށެވެ.

އެހެންކަމުން އެރަށާއި ގުޅިގެން އެއްވެސް ދަރަންޏެއް ނުވަތަ މައްސަލައެއް އޮތްފަރާތެއް ވާނަމަ 14 ދުވަހުގެ ތެރޭގައި ޓޫރިޒަމް މިނިސްޓްރީއަށް އަންގަވައި ދެއްވުމަށް މިނިސްޓްރީން ވަނީ އިޢުލާން ކޮށްފައެވެ.

އެމްއެމްޕީއާރުސީގެ ޚިޔާނާތުގައި ހިމެނޭ ރ. ފުއްގިރި ކުއްޔަށް ދޫކުރުމުގައި ކުރީގެ ރައީސް ޢަބްދުالله ޔާމީން މަގާމުގެ ނުފޫޒު ބޭނުން ކޮށްގެން ރިޝްވަތު ނަގައި އަދި އެ ފައިސާ ބޭނުން ކޮށްގެން މަނީ ލޯންޑާ ކުރުމުގެ އަމަލު ހިންގަވާފައި ކަމަށް ބުނެ ދައުލަތުން ވަނީ ރައީސް ޔާމިންގެ މައްޗަށް ދެ ދައުވާ އުފުލާފައެވެ. އެރަށް ކުއްޔަށް ދޫކޮށް ރިޝްވަތުގެ ގޮތުގައި 1،117،000 އެމެރިކާ ޑޮލަރު ޔާމީން ނަންގަވާފައިވާ ކަމަށް ދައުލަތުން ވަނީ ތުހުމަތުކޮށްފައެވެ.

އެރަށާއި ގުޅިގެން ދައުލަތުން ބުނެފައިވަނީ ރައީސް ޔާމީން ރިޝްވަތު ނަންގަވާފައި ވަނީ ފުއްގިރީގައި ރިސޯޓެއް ހަދަން އެރަށް ކުއްޔަށް ދޫކޮށްގެން މއ. ކުރިކީލަހިޔާ، އަހްމަދު ކްރިކް ރިޒާ މެދުވެރިކޮށް ކަމަށެވެ. އަދި މަނީލޯންޑާ ކޮށްފައިވަނީ ސަން ކޮންސްޓްރަކްޝަން އެންޑް އިންޖިނިއަރިން އާއި ސަން އިންވެސްޓްމެންޓް ބޭނުން ކޮށްގެން ކަމަށް ދަޢުލަތުން ވަނީ ބުނެފައެވެ.

މިދިޔަ އަހަރުގެ ފަހުކޮޅު ޕެންޑޯރާ ޕޭޕާސްގައި ލީކުކޮށްލި މަޢުލޫމާތުތަކުގައިވާ ގޮތުން ފުއްގިރިއަކީ ބީލަމަކާ ނުލައި 2015 އަހަރު ދުބާއީގެ ކްލެސިކް ސިޓީ އައިލެންޑް ހޯލްޑިންސްއަށް 1.55 މިލިއަން ޑޮލަރަށް ވިއްކާލި ރަށެކެވެ. ކްލެސިކް ސިޓީ އަކީ އިންޑިއާގެ ފޮރިން އެކްސްޗޭންގް ގާނޫނާ ހިލާފަށް މަނީލޯންޑާ ކުރުމުގެ ތުހުމަތު އޮންނަ އިންޑިއާގެ ވިޔަފާރިވެރިއެއް ކަމުގައިވާ އަވީނާޝް ބޯޝާލް އާއި އިންޑިއާގެ ޕޫނޭގައި ނުފޫޒުގަދަ ވިޔަފާރިވެރިއަކާއި އަމިތު ކުމާރު ގާނދީ ނަމަކަށް ކިޔާ ވިޔަފާރިވެރިއަކު ހިއްސާވާ ކުންފުންޏެއް ކަމަށް އެ ލިޔުންތަކުގައިވެއެވެ.