ރަމަޟާންމަހާ ދިމާކޮށް ސައުދީ ސަރުކާރުން ރާއްޖެއަށް ހަދިޔާކުރާ ކަދުރު ހުރީ ގެނައުމުގެ މަގުމަތީގައިކަމަށް އިސްލާމިކް މިނިސްޓްރީން ބުނެފިއެވެ.

ކޮންމެއަހަރަކުވެސް ރަމަޟާންމަހު ސަޢުދީ ސަރުކާރުން ހަދިޔާކުރާ ކަދުރު މިއަހަރު ޢާއްމުންނަށް ނުލިބޭތީ އެކަމުގެ ކަންބޮޑުވުން މީސްމީޑިއާގައި ގިނަބަޔަކު ދަނީ ފާޅުކުރަމުންނެވެ.

އިސްލާމިކް މިނިސްޓްރީން ހާމަކޮށްފައިވާ ގޮތުގައި މިއަހަރުގެ ރަމަޟާންމަހު ސަޢުދީން ހަދިޔާކުރާ ކަދުރު އަދިހުރީ ރާއްޖެ ގެނައުމުގެ މަގުމަތީގައި ކަމަށެވެ. އަދި ކަދުރު ލިބުމުން ބެހުމުގެ އިންތިޒާމް ހަމަޖައްސަވާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ.

ސައުދީ ސަރުކާރުން ކޮންމެ އަހަރަކު ރާއްޖެއަށް ކަދުރު ފޯރުކޮށްދޭއިރު، މިދިޔަ އަހަރު ދީފައި ވަނީ 25 ޓަނުގެ ކަދުރު ނުވަތަ 12،500 ކަދުރު ޕެކެޓެވެ.

އިސްލާމިކް މިނިސްޓްރީން މިދިޔަ އަހަރު ކަދުރު ބަހާފައިވަނީ ފަގީރުންގެ ދަފުތަރުގައި ހިމެނޭ ކޮންމެ މީހަކަަށް ޕެކެޓެއްގެ މަގުންނެވެ. އަދި ކުޑަކުދިންގެ ހިޔާއާއި ފިޔަވަތީގައި ތިބި ކުދިންނާއި ގުރަައިދޫ މަރުކަޒުގައި ތިބި މީހުންނާއި ޖަލުގައި ތިބި މީހުނަށްވެސް ކަދުރު ވަނީ ބަހާފައެވެ.