ޒަމާނުއްސުރެން މާލޭގައި ބާއްވަމުން އައި އިޙްޔާ ފޯރަމް، އަތޮޅުތެރެއަށް އަމާޒުކޮށް، މާލެއެކޭ އެއްފެންވަރެއްގައި އަތޮޅުތެރޭގައި ބާއްވާ ފުރަތަމަ އިޙްޔާ ފޯރަމް މިރޭ ކުޅުދުއްފުށީ ސިޓީގައި އޮންނާނެ ކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން ބުނީ ކުޅުދުއްފުށީގެ ހދ. އަތޮޅު ތަޢުލީމީ މަރުކަޒުގައި މިރޭ 21:30 އިން 22:30 އަށް ގެންދާ މި ފޯރަމްގައި ތަޤުރީރުކުރައްވާނީ ޑރ. ސަޢުދުﷲ ޢަލީ އާއި އައްޝައިޚް ޢަބްދުލް ޢަޒީޒު ޙުސައިން ކަމަށެވެ. މިރޭގެ މައުޟޫއުއަކީ "ދީނުގެ ޝިޢާރުތަކަށް ޙުރުމަތްތެރިކޮށް ހިތުން" މި މައުޟޫއެވެ. މިރޭގެ ފޯރަމް މުންނާރު ޗެނަލުން ވަގުތުން ދައްކާނެއެވެ.

މި އަހަރުގެ އިޙްޔާ ފޯރަމްތައް ކުރިއަށްދާނީ ކޮންމެ ހުކުރު ދުވަހެއްގެ ރޭ އަތޮޅުތަކަށް ޚާއްސަކޮށްގެންނެވެ. އެގޮތުން މިރޭ ކުޅުދުއްފުށީ ސިޓީގައި އިޙްޔާ ފޯރަމް ބާއްވާއިރު 15 އޭޕްރީލްގައި އައްޑޫ ސިޓީގައި، 22 އޭޕްރީލްގައި ފުވައްމުލަކު ސިޓީގައި، އަދި 29 އޭޕްރީލްގައި ރ. އުނގޫފާރުގައި މި ފޯރަމް ކުރިއަށް ގެންދާނެއެވެ.

އާދިއްތަ އަދި ބުރާސްފަތި ދުވަހު އިޙްޔާ ފޯރަމްތައް ކުރިއަށްދާނީ މާލެ ސިޓީ، އިސްލާމީ މަރުކަޒުގައެވެ.

މިއީ ރަމަޟާން މަހުގެ ރޭތައް އިޙްޔާކުރުމުގެ ޖަލްސާތައް ބާއްވަންފެށިފަހުން، އަތޮޅުތެރޭގެ ރަށެއްގައި މިފަދަ ޖަލްސާއެއް ބާއްވާ ފުރަތަމަ ފަހަރެވެ.