ދިވެހިރާއްޖެއަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ބެއްލެވުމުގެ ދަށުން، ކޯވިޑް-19 އެންމެ ރަނގަޅަށް މެނޭޖުކުރި އެއް ގައުމު ކަމަށް ހެލްތު މިނިސްޓަރ އަޙްމަދު ނަސީމް މިރޭ ވިދާޅުވެއްޖެއެވެ.

މިނިސްޓަރ ނަސީމް މިފަދައިން ވިދާޅުވީ، ދުނިޔޭގެ ސިއްހަތު ދުވަސް ފާހަގަކުރަން މިރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. މިރޭގެ ރަސްމިއްޔާތުގައި ނަސީމް ވިދާޅުވީ، މުޅި ދުނިޔެއަށް ދިމާވި އާލަމީ ބަވާއެއް ކަމަށްވާ ކޯވިޑް-19 ގެ ހާލަތުގައި ވެސް މި ގައުމު ވަނީ ދުނިޔެއަށް ނަމޫނާ ދައްކާފައި ކަމަށެެވެ.

އެގޮތުން، ރައީސް ޞާލިޙްގެ ބެއްލެވުމުގެ ދަށުން އެންމެ ރަނގަޅަށް ކޮވިޑު މެނޭޖުކުރި އެއް ގައުމަކީ ދިވެހިރާއްޖެކަމަށާއި، އެންމެ އަވަހަށް ބޯޑަރުތައް ހުޅުވާ، އިގުތިސާދީ އަދި އިޖުތިމާއީ ހަރަކާތްތަކަށް އަލުން ރުޖޫއަވީ ގައުމަކީ ވެސް ދިވެހިރާއްޖެ ކަމަށް އޭނާ ވިދާޅުވިއެވެ.

"ކޮވިޑުގެ އެންމެ ނުރައްކާ ހާލަތުގައި އެންމެ އަވަހަށް އަރައިގަތް ގައުމަކީ ދިވެހިރާއްޖެ." މިނިސްޓަރ ނަސީމް މިރޭ ވިދާޅުވިއެވެ.

ކޮވިޑުން އަރައިގަތުމަށް ކުރެވުނު މުހިންމު ކަންކަން ހުލާސާ ގޮތެއްގައި ހިއްސާ ކުރައްވަމުން ނަސީމް ވިދާޅުވީ، ކޮވިޑު މެނޭޖު ކުރެވުނީ، ރާއްޖޭގެ ސިއްހީ ދާއިރާގައި މަސައްކަތް ކުރާ ފަރާތްތަކާ ދައުލަތުގެ އެހެނިހެން އިދާރާތަކާއި ކުންފުނިތަކާއި ޖަމިއްޔާ ޖަމާއަތްތަކާއި އާންމު ރައްޔިތުންގެ ވެސް ވަރަށް ބޮޑު އެއްބާރުލުމަކާ އެކުކަމަށެވެ. އެހެންކަމުން ޖުމުލަކޮށް އެ އެންމެހާ ފަރާތްތަކަށް މިނިސްޓަރ ވަނީ ޝުކުރު އަދާކުރައްވާފައެވެ.

މިރޭގެ ޖަލްސާގައި މިނިސްޓަރ ނަސީމް ވަނީ، ރާއްޖޭގައި ކެންސަރު ބަލި ގިނަވާ ސަބަބު ދެނެގަތުމަށް ދިރާސާއެއް ކުރަން ފަށާފައިވާކަން ވެސް ހާމަ ކުރައްވާފައެވެ. އެގޮތުން، ކެއުންބުއިމާއި ދިރިއުޅޭ މާހައުލުގެ ސަބަބުން ކުރިމަތިވާ ސިއްހީ މައްސަލަތައް ދެނެގަތުމުގެ މަސައްކަތްތައް ފަށާފައިވާ ކަމަށާއި ހާއްސަކޮށް، ރާއްޖޭގައި ކެންސަރު ބައްޔަށް ހުށަހެޅޭ ސަބަބުތައް ބެލުމަށް ދުނިޔޭގެ ސިއްހަތު ޖަމިއްޔާއާ ގުޅިގެން ދިރާސާކުރަން ފަށާފައިވާ ކަމަށް އޭނާ ވިދާޅުވިއެވެ.