އެޗްޑީސީގެ މުވައްޒަފުންނަށް ހައުސިންގ ސްކީމެއް ފެށުމަށް އެކުންފުނިން ނިންމައިފިއެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ވަނީ އެކުންފުނީގެ މުވައްޒަފުންނަށް 629 ހައުސިން ޔުނިޓް ދޫކުރަން ނިންމައި، އެކަން މިހާރު އިއުލާންކޮށްފައެވެ.

އެޗްޑީސީން ބުނީ 629 ހައުސިން ޔުނިޓްގެ ތެރޭގައި ހިމެނެނީ އިންސްޓޯލްމެންޓް އުސޫލުން ދައްކާ ހަލާސްކުރާ 409 ޔުނިޓާއި ބޭންކް ލޯނުގެ ދަށުން ދޫކުރާ 220 ޔުނިޓްކަމަށެވެ. މީގެ ތެރެއިން ބޭންކް ލޯނު މެދުވެރިކޮށް ދޫކުރާ ޔުނިޓްތަކަކީ އަމިއްލަ ފަރާތްތަކުން ކުރިޔަށްގެންދާ މިކްސް ރެޒިޑެންޝަލް ޕްރޮޖެކްޓްތަކުން ދޫކުރާ ތަންތަނެވެ. އަދި އެޗްޑީސީއަށް މަހުން މަހަށް ފައިސާ ދައްކައިގެން ހަލާސްކުރާ ތަންތަނަކީ އެ ކުންފުނީގެ ހައުސިން ޕްރޮޖެކްޓްކަމަށް އެޗްޑީސީން ބުނެއެވެ.

އެޗްޑީސީގެ ހައުސިން ޔުނިޓަށް ކުރިމަތިލާ ސްޓާފުންގެ ހުންނަންޖެހޭ އަސާސީ ޝަރުތުތަކަކީ، އެޗްޑީސީގެ ވަޒީފާގައި އުޅޭތާ އެއް އަހަރުވެފައިވުން، ދާއިމީ އަދި ދިވެހި މުވައްޒަފަކަށްވުން، އެއް އަހަރަށްވުރެ ދިގު ނޯ ޕޭ ލީވްއެއްގައި ހުރި މުވައްޒަފަކަށް ނުވުން، މީގެ ކުރިން އެފަދަ ސްކީމަކުން ފްލެޓް ލިބިފައިވާނަމަ އެ ފްލެޓް އެޗްޑީސީއަށް ދޫކުރަން އެއްބަސްވުން، ވަޒީފާގެ އިންޒާރު ލިޔުމުން ދީފައިވާ މުވައްޒަފެއްނަމަ އެ އިންޒާރަށް ތިން އަހަރުވެފައިވުން، އެޗްޑީސީގެ 12 ރެޒިޑެންސް ޕްރޮޖެކްޓުން ފްލެޓް ލިބިގައިވާ މުވައްޒަފަކަށް ނުވުން ހިމެނެއެވެ.

އެޗްޑީސީން ސްޓާފުންނަށް ދޭ ސްޓެންޑާޑް ހައުސިން ޔުނިޓްތަކަކީ އެއީ އެއް ކޮޓަރިއާއި އެއް ފާހާނާއިން ފެށިގެން ގޮސް، ހަތަރު ކޮޓަރިއާއި ހަތަރު ފާހާނާގެ ޔުނިޓްތަކެކެވެ. އެ ޔުނިޓްތަކުގެ އަގުތައް އުޅެނީ 1.04 މިލިއަނާއި 2.3 މިލިއަނާ ދެމެދުގައެވެ.

އެޗްޑީސީން ބުނީ މުވައްޒަފުންނަށް ހައުސިން ޔުނިޓް ދިނުމުގައި މާލީ ގާބިލުކަން ހުރި މިންވަރު އެ ކުންފުނިން ވަޒަން ކުރާނޭ ކަމަށެވެ. އަދި އެފަދަ ގާބިލުކަމެއް ނެތްނަމަ އެ މުވައްޒަފަކަށް އެ ފުރުސަތެއް ނުލިބޭނެ ކަމަށް އެކުންފުނިން ބުނެއެވެ.

އެޗްޑީސީގެ އިތުރުން ސަރުކާރުގެ އެހެން ކުންފުނިތަކުންވެސް ދަނީ ބޯހިޔާވަހިކަމުގެ މަޝްރޫއުތައް ހިންގަމުންނެވެ.