ޕްރައިމަރީއަކާނުލާ ރައީސް ޞާލިޙަށް ރިޔާސީ ޓިކެޓް ދޭންޖެހޭކަމަށް ރައްޔިތުންގެ މަޖިލީހުގެ ފުވައްމުލަކު އުތުރު ދާއިރާގެ މެންބަރު މުހައްމަދު ރަޝީދު (ދޮންބެ) ވިދާޅުވެއްޖެއެވެ.

މެންބަރު ދޮންބެ މިމޭރުމުން ވިދާޅުވެފައިވަނީ އެމްޑީޕީގެ އެތެރޭގެ އިންތިޚާބުގައި ވާދަކުރަށްވާ އިކޮނޮމިކް މިނިސްޓަރ ފައްޔާޟު އިސްމާޢީލްގެ ކެމްޕޭން އިވެންޓެއްގައި ވާހަކަފުޅު ދައްކަވަމުންނެވެ. ދޮންބެ ވިދާޅުވީ އޭނާއަކީ ފުރިހަމައަށް ރިޔާސީ ނިޒާމް ޤަބޫލުކުރަށްވާ ފަރާތެއް ކަމަށާއި އެހެންކަމުން ރައީސް ޞާލިހަށް ޕްރައިމަރީއަކާ ނުލާ ރިޔާސީ ޓިކެޓް ދޭންޖެހޭ ކަމަށެވެ.

"ރާއްޖޭގައި ކޮވިޑްގެ ޙާލަތުގައި ކޮވިޑް މެނޭޖްކުރިގޮތަށް ބަލާފައިވެސް އެއްވެސް ޝަރުތަކާނުލާ ރައީސް ޞާލިޙަށް ދެވަނަ ދައުރެއްގެ ރިޔާސީ ޓިކެޓް ދޭންޖެހޭ." ދޮންބެ ވިދާޅުވިއެވެ.

Gabool kuraa nizaamakee Riyaasy nizaam, Primary akaa nulaa RJ @ibusolih ah Riyaasy ticket dheyn jehey - MP @DhonbeRasheed pic.twitter.com/pNUMC9wZQI

— Maimoon (@mrsays_) April 15, 2022

ދޮންބެގެ ވާހަކައިގައިވަނީ އެންމެފަހުން އެމެރިކާގައި ބޭއްވި ރިޔާސީ އިންތިޚާބުގައި ޓްރަމްޕަށް ޓިކެޓްދިން ގޮތަށްވެސް އަލިއަޅުއްވާލައްވާފައެވެ.

އެމްޑީޕީގެ އެތެރޭގެ އިންތިހާބުގައި އެ ޕާޓީގެ ދެ ފެކްޝަނުން ވެސް ފޯރީގައި ދަނީ ކެމްޕޭން ކުރަމުންނެވެ. ދެފަރާތުން ވެސް އަންނަނީ ވަރުގަދަ ބަހުގެ ހަމަލާތައްވެސް ދެމުންނެވެ. މި އިންތިހާބު ބާއްވަން މިހާރު ހަމަޖެހިފައިވަނީ މި ފެށޭ މެއި މަހުގެ 14 ވަނަ ދުވަހުއެވެ.