އެމްޑީޕީގެ ޗެއަރޕާސަންގެ އިންތިޚާބުގައި ރައްޔިތުންގެ މަޖިލީހުގެ އެމްޑީޕީގެ ގިނަ މެންބަރުން މިނިސްޓަރ ފައްޔާަޒަށް ތާޢީދުކުރަނީ މަޖުބޫރުކަމެއްނެތި ކަމަށް ދިއްގަރު ދާއިރާގެ މެންބަރު އިކްރާމް ޙަސަން ވިދާޅުވެއްޖެއެވެ.

މެންބަރު އިކްރާމް މިމޭރުމުން ވިދާޅުވެފައިމިވަނީ އެމްޑީޕީގެ ޗެއަރޕާސަންގެ އިންތިޚާބުގެ ކެމްޕޭން ފޯރި ވަރަށް ގަދަވެފައިވާ ދަނޑިވަޅެއްގައެވެ. އެގޮތުން އެމްޑީޕީއަށް ނިސްބަތްވާ މަޖިލީހުގެ މެންބަރުންގެ ތެރެއިން ގިނަ މެންބަރުން ތާޢީދު ކުރަށްވަމުން ގެންދަވަނީ މިނިސްޓަރ ފައްޔާޒަށެވެ.

އިކްރާމް ވިދާޅުވީ މަޖިލީހުގެ އެމްޑީޕީގެ ސާޅީހަށްވުރެ ގިނަ މެންބަރުންނާއި ދާއިރާތަކުގެ ރައީސުންގެ ބޮޑު މެޖޯރިޓީއެއް މިނިސްޓަރ ފައްޔާޒާއި އަންހެނުންގެ ރޫހުގެ ރައީސްކަމަށް ރޮޒައިނާއަށް އެއްވެސް މަޖުބޫރުކަމެއްނެތި ތާޢީދުކުރާނީ ހަގީގަތުގައިވެސް އެމްޑީޕީ ހިންގާލަން ބޭނުންވާތީ ކަމަށެވެ.

Majleehuge 40 ah vure gina MDP MPs, 3/4 anhen MPs adhi Dhaairaa Raeesunge bodu majorityeh #Faya4CP adhi #Rozey4ARR ah evves majboor kameh nethi thaeedh kuraanee hageegathgaives #MDPhingaalan beynunve ekanvaanee @faya_i adhi @Roxeyna kamah gabool kohgen. Emmen ekuga #KKBK pic.twitter.com/Fnj69o1mIW

— Ikram Hassan MP (@ikramhassan) April 16, 2022

އޭގެ އިތުރުން އިކްރާމްވަނީ އެމްޑީޕީގެ ޗެއަރޕާސަންކަމަށް އެންމެން ގުޅިގެން ފައްޔާޒް ހޮވުމަށް މަސައްކަތްކުރުމަށް ގޮވާލައްވާފައެވެ.

އެމްޑީޕީގެ ޗެއަރޕާސަންގެ އިންތިހާބުގެ ކެމްޕޭންތެރޭގައި ދާދިފަހުން ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ ވަނީ އިންތިހާބުގެ ކެމްޕޭންގައި ފައްޔާޒުގެ ޓީމުން ވަޒީފާގެ ބިރު ދައްކާ ކަމަށާއި ޕްރޮޖެކްޓްތައް ހުއްޓާލާނެކަމުގެ ބިރު ދައްކާ ކަމަށް ތުހުމަތު ކޮށްފައެވެ. އަދި މިނިސްޓަރުކަމުގެ މަގާމު ހަމަވާން އޮތީ ދޮޅު އަހަރެއްހާ ދުވަސް ކަމަށް އީވާ ވަނީ ވިދާޅުވެފައެވެ.

އެމްޑީޕީގެ ޗެއާޕާސަން އިންތިޚާބު ބޭއްވުމަށް ހަމަޖެހިފައިވަނީ އަންނަ މެއި މަހުގެ 14 ވަނަ ދުވަހުއެވެ.