ފެލިދެއަތޮޅަކީ ދިވެހިރާއްޖޭގެ ޖަޒީރާވަންތަކަން ރަމްޒުކޮށްދޭ އާބާދީ މަދު އަތޮޅެއް ނަމަވެސް އެ އަތޮޅު މީހުންނަކީ ސިޔާސީ ގޮތުން ކުޑަ ބައެއް ނޫންކަމަށް، އެމްޑީޕީގެ ޗެއަރޕާސަންގެ އިންތިހާބުގައި ވާދަކުރައްވާ މި ސަރުކާރުގެ އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވެއްޖެއެވެ.

ކެމްޕޭންގައި ވ. އަތޮޅުގެ ރަށްރަށަށް ކުރައްވަމުން ގެންދަވާ ދަތުރުގައި ފައްޔާޒު މިއަދު ވިދާޅުވީ، ފެލިދެ އަތޮޅަކީ ދިވެހިރާއްޖޭގެ ޖަޒީރާވަންތަކަން ރަމްޒު ކޮށްދޭ އާބާދީގެ ގޮތުން މީހުން މަދު ކުޑަ އަތޮޅެއް ކަމަށްވިޔަސް ސިޔާސީ ހަރަކާތްތަކުގައި ވަކި ކުޑަ ބައެއް ނޫން ކަމަށެވެ. އަދި މިދަތުރުގައި ވ. އަތޮޅުގެ އެމްޑީޕީގެ މެންބަރުން ދެމުންދާ އެއްބާރުލުން މިނިސްޓަރ ފައްޔާޒު ވަނީ ފާހަގަކުރައްވާފައެވެ.

ފެލިދެ އަތޮޅަކީ ދިވެހިރާއްޖޭގެ ޖަޒީރާވަންތަކަން ރަމްޒުކޮށްދޭ އާބާދީގެ ގޮތުން މީހުންމަދު ކުޑަ އަތޮޅެއް ކަމަކު ސިޔާސީ ހަރަކާތްތަކުގައި ވަކި ކުޑަ ބައެއް ނޫން. ވާވު މެންބަރުން ދެއްވި ޔަޤީންކަމުގައި #MDPHingaalan އިރާދަކުރެއްވިއްޔާ އަޅުގަނޑުމެން ދާނީ ބާރަށް ކުރިއަށް.

— Fayyaz Ismail (@faya_i) April 16, 2022

ފައްޔާޒުގެ ޓީމް ވ. އަތޮޅަށް ކުރައްވާ ދަތުރުގައި މިއަދުވަނީ، ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދޫއަށް ވަޑައިގެންފައެވެ. މި ދަތުރުގައި އެމްޑީޕީގެ އެތެރޭގެ އިންތިހާބުގައި އަންހެނުންގެ ރޫހުގެ ރައީސާކަމަށް ވާދަކުރައްވާ މީދޫ ދާއިރާގެ މަޖިލިސް މެންބަރު ރޮޒޭނާ އާދަމް ވެސް ބައިވެރިވެވަޑައިގަންނަވައެވެ.

މި އިންތިހާބުގައި ފައްޔާޒުގެ ޓީމުން ބުނަމުންދަނީ، އެ ޓީމް ހޮވަންޖެހޭ މައިގަނޑު ސަބަބަކީ އެމްޑީޕީ ހިނގަންވާވަރަށް މިހާރު ނުހިނގާތީ އެ ޕާޓީ ހިންގާލަން ކަމަށެވެ.

މިއަންނަ މެއި މަހުގެ 14 ވަނަ ދުވަހު ބޭއްވުމަށް ހަމަޖެހިފައިވާ އެމްޑީޕީގެ އެތެރޭގެ އިންތިހާބުގައި އެ ޕާޓީގައި އުފެދިފައިވާ ދެ ފެކްޝަނުން ވެސް ދަނީ ފޯރީގައި ކެމްޕޭން ކުރަމުންނެވެ. އެގޮތުން ދެ ފެކްޝަނުންވެސް ދަނީ އަތޮޅުގެ ރަށްރަށަށް ދަތުރު ކުރައްވާ އާންމު މެންބަރުންނާ ބައްދަލު ކުރައްވަމުންނެވެ.